Եվրոպական միությունը ծրագրում է պարտավորեցնել Լոնդոնին ամենամյա վճարումներ կատարել այն բանից հետո, երբ 2019 թվականին Մեծ Բրիտանիան դուրս կգա ԵՄ կազմից, հաղորդում է DW-ն:
Բացի այդ, Եվրամիությունը մտադիր է հասնել այն բանին, որ Միացյալ Թագավորությունը թույլ տա ԵՄ քաղաքացիների ընտանիքների վերամիավորումը Մեծ Բրիտանիայում: Այս մասին ուրբաթ օրը` ապրիլի 21-ին, հաղորդում է Reuters գործակալությունը` վկայակոչելով Բրյուսելի նախապատրաստած փաստաթղթին: Դրան համապատասխան, Brexit-ից հետո անցումային ժամանակաշրջանում Լոնդոնը պետք է ենթարկվի Լյուքսեմբուրգի Եվրոպական միության դատարանի որոշումներին (EuGH):
Փաստաթուղթը պետք է դառնա Մեծ Բրիտանիայի հետ բանակցությունների համար մանդատի հիմքը, որի դրույթներով պետք է առաջնորդվի Եվրամիության կողմից բանակցային գործընթացի ղեկավար Միշել Բարնյեն: ԵՄ պետությունների ղեկավարները ծրագրում են այդ մանդատը քննարկել ապրիլի 29-ին Բրյուսելում կայանալիք գագաթնաժողովում:
Փաստաթղթի նախագիծը ենթադրում է, որ Brexit-ի շուրջ բանակցություններում կոնկրետ գումարի մասին կխոսվի, որը Լոնդոնը պետք է վճարի եվրոյով: Գումարի վերջնական թիվը չի նշվել, սակայն Մեծ Բրիտանիան արդեն մերժել է ավելի վաղ Եվրահանձնաժողովի նշած 60 միլիարդ եվրոն:
Համաձայն փաստաթղթի այլ դրույթների` Միացյալ Թագավորությունը պետք է պահպանի աշխատանքի իրավունքն ու ԵՄ քաղաքացիներին ցմահ կենսաթոշակ նշանակի, որոնք Եվրամիության կազմից դուրս գալու պահին ապրում են այնտեղ: