Սիրիայի հանրապետության պաշտոնական անվանման մեջ «Արաբական» բառի առկայության հարցը կարող է լուծել միայն հանրաքվեն՝ ըստ սահմանադրության, դեռեւս վաղ է այն քննարկելը, կարծում է Սիրիայի նախագահ Բաշար Ասադը: «ՌԻԱ Նովոստի»-ի հետ հարցազրույցում նա նշել է, որ «կառավարություն լինելով՝ մենք սահմանադրության սեփականատերերը չենք, այն պետք է Սիրիայում կոնսենսուս ունենա»:
«Եթե սիրիացիները չեն հավատում «արաբական պետություն» արտահայտությանը, ի՞նչ իմաստ ունի այն օգտագործելը: Միայն այն պատճառով, որ կառավարությանը հավատո՞ւմ է: Ո՛չ, մենք մենք պետք է արտացոլենք սիրիացիների մեծամասնության կարծիքը՝ պատասխանելով «այո» կամ «ոչ»: Մեզ թվում է, որ սիրիացիների մեծամասնությունն այս արտահայտությանը կողմ է, քանի որ նրանք արաբներ են եւ հավատում են իրենց ինքնությանը: Բայց դարձյալ ես չէի փորձի ասել՝ դա ճիշտ է կամ սխալ, մինչեւ սիրիացիներն իրենք այդ մասին չասեն հանրաքվեում, միայն հետո ասելով, որ նախագահը հայտարարել է այդ արտահայտության աջակցության մասին կամ հանդես է եկել դրա դեմ: Դեռեւս դա ոչ մի բան չի նշանակում»,- շեշտել է Ասադը:
Սիրիայի նախագահը պարզաբանել է, որ «դեռեւս վաղ է այս հարցը քննարկելը, սա վեճերի առարկա չէ, ես նկատի ունեմ, որ ոչ ոք այն հիմա չի քննարկում»: «Սա մեծ խնդիր չէ»,- համոզված է Ասադը:
Մոսկվան հունվարին Աստանայում անցկացված միջսիրիական բանակցությունների առաջին ռաունդում կողմերին առաջարկ էր փոխանցել երկրի սահմանադրության նախագծի վերաբերյալ: ՌԴ ԱԳ նախարար Սերգեյ Լավրովի խոսքով՝ դրանով իսկ Ռուսաստանը ապագա հիմնական օրենքի բովանդակության բանավեճ է մեկնարկել:
