Պաշտոնական տեղեկություններով, հունիսին Հայաստանի պետբյուջեի հարկային եկամուտների գանձման տեմպը դանդաղել է։ Այդ գործընթացը սկսվել է դեռ մայիսին և պահպանվել է կիսամյակի վերջին ամսին։
Ընդհանուր առմամբ հունվար- հունիս ամիսներին հավաքված հարկերի գումարը տարեկան կտրվածքով ավելացել է 7․3 տոկոսով։ Սակայն դա տեղի է ունեցել միայն ընթացիկ տարվա առաջին ամիսների «շնորհիվ», քանի որ հաշվետու հունիսին տեմպը նվազել է մինչեւ 2․6 տոկոս։
Դանդաղման պատճառները կապակցված են մի շարք հիմնական հարկերից հավաքված գումարի կրճատման հետ։ Հունիսին, տարեկան կտրվածքով ամենամեծ անկումն են ունեցել եկամտահարկն ու շահութահարկը, յուրաքանչյուրը նույն մեծության գումարով՝ 2․4 մլրդ դրամով։ Հարաբերական ցուցանիշներով հակառեկորդ է սահմանել շահութահարկը՝ անկում ավելի քան 18 տոկոսով։
ԱԱՀ-ն, որը ժամանակին հարկերի առաջատարն էր, նույնպես չի խուսափել այդ ճակատագրից։ Հունիսին ԱԱՀ գումարը նվազել է տարեկան կտրվածքով 1․6 մլրդ դրամով, կամ էլ 5․3 տոկոսով; Ուշագրավ է , որ ԵՏՄ երկրներից ներմուծվող ապրանքների մասով ԱԱՀ-ի գումարն ավելացել է 2․3 մլրդ դրամով, կամ էլ 46․7 տոկոսով։ Այսինքն գրեթե մեկուկես անգամ։
Հասկանալի է, որ ԵՏՄ երկրներից ներմուծման առյուծի բաժինը Ռուսաստանինն է, որտեղից մեր երկիր է ներմուծվում հիմնականում բնական գազ, նավթամթերք, նաեւ հացահատիկ։ Այսինքն ապրանքներ, որոնք ծավալով զբաղեցնում են մեր ներմուծման վերին հորիզոնականները։
Ի դեպ, ԱԱՀ-ն կորցրել է իր առաջատար դիրքը երկրի պեբյուջեի հարկային եկամուտներում։ Եվ այսպես, հաշվետու ամսում, ընդհանուր ցուցանիշում իր մասնաբաժնով, եկամտահարկը զուտ խորհրդանշորեն է զիջել ԱԱՀ-ին՝ 30․4 տոկոսը 30․5 տոկոսի դեմ։ Ճիշտ է, եկամտահարկում, բացի շահութահարկից, ներառված են նաեւ սոցիալական ապահովագրության վճարները (որոնք ժամանակին վճարվում էին նախկին Կենսաթոշակային ֆոնդին)։