Իսրայելի ընդդիմադիր «Եշ Ատիդ» կուսակցության առաջնորդ Յաիր Լապիդը հայտարարել է Կնեսետ Հայոց ցեղասպանության ճանաչման մասին բանաձեւ ներկայացնելու իր կուսակցության մտադրության մասին, հայտնում է Times of Israel-ը:
Յաիր Լապիդը նշել է, որ Իսրայելի եւ Թուրքիայի միջեւ հաշտեցումը դիվանագիտական սխալ էր, նաեւ կոչ է արել «թաղել» Թուրքիա գազատարի նախագիծը եւ աջակցել «անկախ Քուրդիստանի պետության ստեղծմանը»:
Նշենք, որ Լապիդը Թուրքիայի նախագահ Ռեջեփ Թայիփ Էրդողանին կշտամբել է, որ նա Հայոց ցեղասպանությունը չի ճանաչել: «Նրանք, ովքեր ժխտում են Հայոց ցեղասպանության ժամանակ երեխաների սպանությունը, չպետք է բարոյականություն քարոզեն»,- իր միկրոբլոգում նշել է Լապիդը:
Հիշեցնենք, որ Էրդողանին իսրայելցի քաղաքական գոծիչները խստորեն քննադատել են այն բանից հետո, երբ նա քննադատական դիիտողություններ է արել ԱՄՆ նախագահ Դոնալդ Թրամփի կողմից Երուսաղեմը Իսրայելի մայրաքաղաք ճանաչելու առիթով: Ավելին՝ Էրդողանն առաջարկել է Երուսաղեմը Պաղեստինի մայրաքաղաք հռչակել:
