ՄԱԿ-ում ԱՄՆ մշտական ներկայացուցիչ Նիկի Հեյլին հայտարարել է, որ ԱՄՆ-ն մտադիր է ՄԱԿ-ի միջոցով շարունակել Հյուսիսային Կորեայի վրա գործադրվող ճնշումը, հաղորդում է Коммерсант.ру–ն՝ վկայակոչելով Մշտական ներկայացուցչության կայքում տեղադրված հաղորդագրությունը:
Հայտարարության մեջ նշվում է, որ Միացյալ Նահանգներն արդեն ՄԱԿ–ի Հյուսիսային Կորեայի հարցով կոմիտե է ուղարկել Հյուսիսային Կորեայի դեմ պատժամիջոցների ցանկի ընդլայնման վերաբերյալ առաջարկ: Դրանք ուղղված են «նավթի ստացման եւ ածուխի վաճառքի համար Հյուսիսային Կորեայի մաքսանենգությունների արգելմանը»:
Նախօրեին ԱՄՆ նախագահ Դոնալդ Թրամփը հայտարարել էր Հյուսիսային Կորեայի նկատմամբ պատժամիջոցների ամենախոշոր փաթեթի մեկնարկի մասին: ԱՄՆ Ֆինանսների նախարարությունը սեւ ցուցակի մեջ է ընդգրկել մեկ ֆիզիկական անձի, 27 ընկերությունների եւ 28 նավերի, որոնք «չնայած պատժամիջոցներին համագործակցում էին Փհենյանի հետ»:
