Ֆրանսիայում դատարանը 6 ամսվա ազատազրկման է դատապարտել կնոջը, որը հրաժարվել է կատարել ոստիկանության պահանջը՝ հանել նիկաբը, հայտնում է FranceInfo-ն։ Վճիռը առաջ է բերել Ֆրանսիայի մահմեդական համայնքի վրդովմունքը։
Կինը կալանավորվել էր ապրիլին Տուլուզում այն բանից հետո, երբ նրան կանգնեցրել էին ոստիկանները եւ պահանջել հանել նիկաբը, որը արգելված է կրել Ֆրանսիայում։ Սակայն կինը հրաժարվել էր, ապա սկսել էր օգնություն կանչել։ Նրան կալանավորել եւ նստեցրել են ոստիկանական մեքենան, բայց ոստիկանները ստիպված են եղել բախվել մերձակայքում գտնվող 30 մարդու դիմադրությանը, ուստի արցունքաբեր գազ են կիրառել։ Միջադեպը քաղաքում անկարգությունների պատճառ է դարձել, որի ընթացքում տասնյակ մեքենաներ են այրել։
37-ամյա կինը կես տարվա ազատազրկման է դատապարտվել ոստիկանների նկատմամբ անհարգալից վերաբերմունքի, դիմադրություն ցույց տալու եւ սպառնալիքներ հնչեցնելու մեղադրանքով։ Նա պետք է 100 եվրո տուգանք եւ 1000 եվրո ոստիկաններին փոխհատուցում վճարի։
Կինը հերքել է մեղադրանքները՝ հայտարարելով, որ ոստիկանները վիրավորել են իրեն։ Նա նաեւ հերքել է, որ նիկաբ է կրել։
