Կենտրոնական ընտրական հանձնաժողովը «Ելք» խմբակցության ավագանու անդամ Ալեն Սիմոնյանի ավագանու մանդատը վաղաժամկետ դադարեցնելու մասին արձանագրություն է ստացել։ Այս մասին այսօր՝ մայիսի 24-ին NEWS.am-ի հետ զրույցում հայտնել է ԿԸՀ նախագահ Տիգրան Մուկուչյանը: Նրա խոսքով, արձանագրությունում նշված չէ Ալեն Սիմոնյանի լիազորությունները վաղաժամ դադարեցնելու հիմնավորում:
Արձանագրությունը ԿԸՀ է ուղարկել Երևանի քաղաքապետ Տարոն Մարգարյանը։
Նշենք, որ Ալեն Սիմոնյանը ԱԺ պատգամավորական մանդատ էր ստացել օրեր առաջ՝ փոխարինելով ՀՀ վարչապետ Նիկոլ Փաշինյանին: Դրանից հետո, արդեն մայիսի 22–ին Ալեն Սիմոնյանը դիմում է ներկայացրել Ազգային ժողովի նախագահ Արա Բաբլոյանին՝ իր պատգամավորական լիազորությունները դադարեցնելու մասին:
Ըստ մամուլի տեղեկությունների, նա ցանկություն ունի մանդատը վայր դնելով մնալ Երեւանի ավագանու անդամ, ինչը թույլ կտա Տարոն Մարգարյանի հնարավոր հրաժարականի դեպքում՝ առաջադրվել քաղաքապետի թեկնածու:
