Հրազդանի նախկին քաղաքապետ Արամ Դանիելյանն իր դեմ հարուցված քրեական գործի հետ կապված մտահոգություններ չունի: Վերջինս NEWS.am-ի հետ զրույցում նշեց, որ նորմալ է համարում գործընթացը եւ այս պահին որեւէ անելիք չունի. «Մտահոգություն չունեմ: Քրեական գործն այս պահին գտնվում է նախաքննական մարմնում, քննություն է ընթանում, որի շրջանակներում հարցաքննվել եմ: Ինչ կարող եմ ասել, գործընթաց է, իր հունով կընթանա, սպասենք, տեսնենք, նախաքննությունը կավարտվի, նոր ինչ-որ բան կկարողանանք ասել»,-նշեց Դանիելյանը՝ այլ մանրամասներ չհայտնելով:
Նշենք, որ այս պահին Հրազդանի համայնքապետարանում «Փըրֆեքթ Աուդիտ» ՍՊԸ կողմից իրականացվում է արտաքին աուդիտ: Հրազդանի համայնքապետարանի աշխատակազմի մամուլի քարտուղար Մայիս Պողոսյանից հետաքրքրվեցինք, թե որ փուլում է գտնվում աուդիտը: Վերջինս հայտնեց, որ աուդիտ իրականացնող ընկերության հետ պայմանագրի ժամկետն ավարտվում է սեպտեմբերի 30-ին.
«Այս պահին որեւէ բան չենք կարող ասել, սպասենք, սահմանված ժամկետում աուդիտը վերջանա, որից հետո համապատասխան եզրակացություն կտրվի, որի մասին կհայտարարենք»,- եղավ պատասխանը:
Ավելի վաղ NEWS.am-ը տեղադրել էր Կոտայքի մարզպետ Ռոմանոս Պետրոսյանի ֆեյսբուքյան գրառումն այն մասին, որ Հրազդանի նախկին քաղաքապետ Արամ Դանիելյանի դեմ հարուցվել է քրեական գործ: Մարզպետի գրառման մեջ մասնավորապես նշված էր. «Ինչպես ավելի վաղ հայտնել էինք, ՀՀ Կոտայքի մարզի Հրազդան համայնքում տեղական ինքնակառավարման մարմինների լիազորությունների կիրարկման նկատմամբ իրականացվել է իրավական եւ մասնագիտական հսկողություն, որի արդյունքում արձանագրվել են մի շարք թերություններ եւ իրավախախտումներ, որոնց վերաբերյալ 2018թ.-ի օգոստոսի 13-ին Կոտայքի մարզպետ Ռոմանոս Պետրոսյանը Կոտայքի մարզի դատախազին հաղորդում էր ուղարկել նշված իրավախախտումները քննության առարկա դարձնելու եւ օրինական կարգով ընթացքը լուծելու համար:
Գործի քննությունը հետագայում հանձնվել է ՀՀ ոստիկանության Կոտայքի մարզային վարչության Հրազդանի բաժնին, որտեղ էլ ՀՀ Քրեական դատավարության օրենսգրքի 35-րդ հոդվածի 1-ին մասի 1-ին կետի հիմքով կայացված որոշմամբ՝ քրեական գործ հարուցելը մերժվել էր:
Սակայն Կոտայքի մարզպետը բողոքարկել է վերոնշյալ որոշումը Կոտայքի մարզի դատախազին: Արդյունքում ՀՀ Քրեական օրենսգրքի 179-րդ հոդվածի 3-րդ մասի 1-ին կետի եւ 308-րդ հոդվածի 1-ին մասի հատկանիշներով Հրազդանի նախկին համայնքապետ Արամ Դանիելյանի նկատմամբ Կոտայքի մարզի դատախազությունում հարուցվել է քրեական գործ եւ ուղարկվել նախաքննության»: