Սոմալիում 12-ամյա աղջկա խմբակային բռնաբարությունը եւ սպանությունը բողոքի բուռն ալիք է բարձրացրել։ Բնակիչները կոչ են անում իշխանություններին առաջնորդվել 2016թ․ ընդունված օրենքով՝ երկրում, որտեղ կանանց հանդեպ բռնությունները հազվադեպ են պատժվում, արդարություն հաստատելու համար՝ հայտնում է Thomson Reuters Foundation-ը։

Այշա Իլիես Ադենին առեւանգել էին Գալկայո քաղաքի շուկայում։ Նրա մարմինը գտնվել էր հաջորդ առավոտյան, իր տան մոտ։ Բժշկական փորձաքննությունը ցույց էր տվել, որ նրան բռնաբարել են, սեռական օրգաններն այլանդակել եւ խեղդամահ արել։

Չորս մարդ ձերբակալվել է։ Սպանության դաժան բնույթը ցասում է առաջացրել արեւելաաֆրիկյան պահպանողական երկրում, որտեղ բռնաբարվելը խարան է, եւ զոհը ավանդաբար ստիպված է ամուսնանալ իրեն բռնաբարողի հետ։

Ցույցեր են տեղի ունեցել Պունտլենդում, եւ սոմալեցիները #JusticeForAisha հեշտեգի միջոցով սոցցանցերում կոչ են անում սպանության պատշաճ հետաքննություն անցկացնել։

2016թ․ Սոմալիի կիսաինքնավար Պունտլենդ շրջանում ընդունվել է սեռական հանցագործությունների մասին երկրում առաջին օրենքը, որը քրեական պատասխանատվություն է նախատեսում բռնաբարության, սեռական ոտնձգությունների համար։