Թուրքիայի ԱԳՆ պաշտոնական ներկայացուցիչ Համի Աքսոյը հինգշաբթի Միացյալ Նահանգներին կոչ է արել հարգել երկրի Բարձրագույն ընտրական հանձնաժողովի ընդունած որոշումները, այդ թվում՝ Ստամբուլում քաղաքապետի նոր ընտրություններ անցկացնելու որոշումը: Այս մասին նշված է երկրի ԱԳՆ տարածած հայտարարության մեջ, փոխանցում է ՏԱՍՍ-ը:
«Մենք բոլոր կողմերին կոչ ենք անում հարգանք դրսեւորել որոշումների նկատմամբ, որոնք ընդունում է Թուրքիայի Բարձրագույն ընտրական հանձնաժողովը: Հարկ է նշել, որ ավելի վաղ կրկնակի ընտրությունների անցկացման որոշումներ ընդունվել են նաեւ ԱՄՆ-ում եւ շատ այլ երկրներում: Համանման հարցերը լուծվում են ժողովրդավարական նորմերի շրջանակում: Բոլոր ընտրություններին մեծ մասնակցությունը վկայում է ժողովրդավարության նորմերին թուրք ժողովրդի հավատարմության եւ ընտրական համակարգին վստահելու մասին»,- նշված է հաղորդագրության մեջ:
Դիվանագետի խոսքով՝ Ստամբուլի քաղաքապետի վերընտրությունների մասին որոշումը ընդունվել է ընտրական օրենսգրքի բազմաթիվ խախտումների պատճառով: «Հունիսի 23-ի նոր ընտրություններում հնարավոր ամեն ինչ կարվի, որ ընտրեն առավելագույն թվով ընտրողներ»,- շեշտել է Աքսոյը:
Նախօրեին Վաշինգտոնը Թուրքիայի իշխանություններին կոչ էր արել Ստամբուլի քաղաքապետի ընտրություններն անցկացնել «օրենքի, ԵԱՀԿ շրջանակում ստանձնած պարտավորությունների, ՆԱՏՕ-ի անդամի կարգավիճակի, ինչպես նաեւ Եվրամիությանն անդամակցելու ձգտման համաձայն»: ԱՄՆ-ն նաեւ անցկացված ընտրությունների արդյունքների չեղարկման որոշումը ոչ սովորական էր անվանել:
Ստամբուլի քաղաքապետի նոր ընտրությունները տեղի կունենան հունիսի 23-ին: Թուրքիայի ԱԳՆ-ն հանդես էր եկել հայտարարությամբ, որում մերժել էր այս որոշման հետ կապված ցանկացած քննադատություն եւ կոչ արել այն հարգել:
Պաշտոնական տվյալների համաձայն՝ Իմամօղլուն առաջ է անցել Յըլդըրըմից՝ մարտի 31-ի ընտրություններում հավաքելով 4,171 մլն ձայն։ ԱԶԿ-ն 2002 թվականից ի վեր առաջին անգամ զիջում է Ստամբուլի քաղաքապետի ընտրություններում, որի քաղաքապետ է եղել Էրդողանը 1994-1998 թվականներին։
