Մենք չգիտենք՝ փաստաթուղթ կա թե չկա: Հայաստանի արտաքին գործերի նախարարությունը փաստաթղթի վերաբերյալ որեւէ տեղեկատվություն չունի: Այս մասին մայիսի 20-ին Սյունիքի մարզում լրագրողների հետ զրույցում ասաց Հայաստանի արտաքին գործերի փոխնախարար Ավետ Ադոնցը:
Նրա խոսքով, իրադարձությունները զարգանում են սրընթաց, այս հարցի հասցեատերը Հայաստանի կառավարությունն է:
«Ես, որպես Հայաստանի արտաքին գործերի նախարարի ժամանակավոր պաշտոնակատար, այլ պատասխան չունեմ: Ելնելով իմ մանդատից՝ ավելին ասել չեմ կարող: Ես չեմ տեսել այդ փաստաթուղթը, չեմ մասնակցել դրա վերաբերյալ քննարկումներին, եթե դա կա»,- ընդգծեց նա:
Սեւ լճի իրավիճակի շուրջ բանակցությունները, ինչպես բացատրեց պաշտոնյան, հիմնականում ընթանում են ուժային կառույցների ներկայացուցիչների միջեւ:
«Մենք գիտենք, որ երեկ ադրբեջանցիները չեն եկել: Տեսնենք, թե ինչ կլինի հետո: Այսօրվա գործընթացները ոտնձգություն են Հայաստանի ինքնիշխանության նկատմամբ եւ խախտում են Հայաստանի Հանրապետության տարածքային ամբողջականությունը: Ադրբեջանի զինված ուժերը պետք է լքեն Հայաստանի տարածքը: Սա բանակցությունները շարունակելու պարտադիր քայլ է: Ադրբեջանը փորձում է այդ տարածքները ներկայացնել որպես իր սեփական՝ վկայակոչելով ինչ-որ խզբզած A4 թուղթ, որը քննարկման առարկա չի կարող լինել»,- հավելեց Ադոնցը:
Փոխնախարարը ողջունեց Սյունիքի մարզ այցելելու Եվրամիության պատվիրակության ղեկավարի եւ ԵՄ երկրների դեսպանների որոշումը:
Նշենք, որ Հայաստանում Եվրամիության պատվիրակության ղեկավար Անդրեա Վիկտորինը եւ ԵՄ երկրների դեսպանները այցելել են Սյունիքի մարզ, եղել են Սեւ լճի հարակից տարածքում, ինչպես նաեւ հանդիպել են մարզպետ Մելիքսեթ Պողոսյանի հետ: