նախընտրելի դարձնել
Առաջատար չորս տեխնոլոգիական ընկերությունները՝ Amazon-ը, Meta-ն, Microsoft-ը և Google-ի մայր ընկերությունը՝ Alphabet-ը, 2026 թվականի համար արհեստական բանականության (ԱԲ) տեխնոլոգիաներում ներդրումների իրենց նախնական ծրագրերը վերանայել են դեպի բարձրացում։ Այժմ նրանք պատրաստ են ծախսել 725 մլրդ դոլար, ինչը 77%-ով ավելի է, քան 2025 թվականի ռեկորդային 410 մլրդ դոլարը, հաղորդում է Financial Times (FT) թերթը։
Թեև ներդրողները, ինչպես նշում է պարբերականը, ավելի վաղ թերահավատություն էին հայտնում այս նպատակների համար ծախսվող հսկայական գումարների վերաբերյալ, ընդհանուր առմամբ նրանք դրական են ընդունել եկամուտների մասին հաշվետվությունները, քանի որ ԱԲ-ի և տվյալների մշակման կենտրոնների նկատմամբ պահանջարկը հանգեցրել է հասույթի և շահույթի զգալի աճի։
Jefferies ընկերության վերլուծաբան Բրենթ Թիլի խոսքով՝ «ԱԲ-ի տնտեսագիտությունն արդյունավետ է և կայուն զարգանում է»։ Տեխնոլոգիական հսկաների հասույթի աճը, նրա խոսքով, վկայում է այն մասին, որ «խոշոր խաղացողները կարող են ծածկել հսկայական կապիտալ ծախսերը»։ Նա տեխնոլոգիական ընկերությունների ֆինանսական ակտիվների գների անկման վերաբերյալ հոռետեսական սպասումները անհեթեթություն է անվանել։
Ընկերությունների գործունեության դրական արդյունքները «կօգնեն կապիտալ ներդնողներին ամրապնդել վստահությունը ներդրումների շարունակական վերադարձելիության հարցում», նշել է UBS-ի վերլուծաբան Սթիվեն Ջուն։
