Անհատի իրավունքների և ազատությունների պաշտպանության վրա հիմնված անկեղծ ու ազնիվ երկկողմ հարաբերություններն ունակ են միջազգային հանրությանը վերադարձնել բնականոն մարդկային հարաբերությունների դաշտ և պաշտպանել դրանք արտաքին քաղաքական շահարկումներից։ Դրա մասին ապրիլի 6-ին Հայաստանի Հանրապետության և Ղազախստանի Հանրապետության միջև փոխգործակցության արդիական հարցերի փորձագիտական քննարկման շրջանակում հայտարարել է ՀՀ առաջին օմբուդսմեն, իրավապաշտպան Լարիսա Ալավերդյանը։

Իր ելույթում նա ընդգծել է փորձագիտական համայնքների համագործակցության բացառիկ դերը՝ նշելով, որ մասնագետների աշխատանքը իրական ժամանակի ռեժիմում ցանկացած համակարգային խնդրի լուծման ակունքն է, լինի դա հաղորդակցություն, թե աշխարհաքաղաքականություն։ Գործընկերներին ղազախերենով ողջունելով՝ Լարիսա Ալավերդյանը մատնանշել է երկու երկրների խոր քաղաքակրթական կապը՝ շեշտելով, որ պետությունների տարբեր արմատներին պատկանելը միայն ընդգծում է բարեկամական և հավասար փոխհարաբերությունների օրինակը։ «Կան տրանսպորտային հաղորդակցություններ, կան խոսակցություններ միջանցքների մասին, դրանք կան, թե չկան կամ կփոխվեն՝ դա չպետք է ազդի երկու պետությունների երկկողմ փոխհարաբերությունների վրա»,- նշել է փորձագետը:

Առաջին Մարդու իրավունքների պաշտպանը հատուկ ուշադրություն է դարձրել «մարդկային չափմանը»՝ հիշեցնելով, որ ցանկացած տնտեսություն, աշխարհաքաղաքականություն և լոգիստիկա ի վերջո գոյություն ունեն մարդու համար։ Նա ցավով փաստել է, որ Հայաստանի և Ղազախստանի իրավապաշտպան կազմակերպությունների միջև ակտիվ շփումները վերջին շրջանում կրճատվել են, և կոչ է արել անհապաղ վերականգնել դրանք։. «Մարդու իրավունքների խախտումը չի նշանակում մարդու միջազգային իրավունքի ոչնչացում։ Դա նշանակում է միայն, որ պետք է բոլորովին այլ խանդավառությամբ մտնել այդ դաշտ»,- ընդգծել է Լարիսա Ալավերդյանը: Ըստ նրա՝ միջազգային հարթակներում այս թեմայով շահարկումները չպետք է ազդանշան դառնան առ այն, որ մարդու իրավունքները դադարում են առաջնահերթություն լինել երկրի ներսում։

Հղում անելով երկու պետությունների բարձրագույն օրենքներին՝ բանախոսը ուշադրություն է հրավիրել սահմանադրական մոտեցումների նույնականության վրա, որտեղ մարդը, նրա կյանքը և արժանապատվությունը հռչակված են որպես բարձրագույն արժեքներ։ Առաջին օմբուդսմենը շեշտել է. «Եթե մենք չենք ցանկանում գլորվել դեպի անկեղծությունից զուրկ ձևական հայտարարություններ, ուրեմն կհասկանանք, որ կա մի ոլորտ, որտեղ մեր շահերը բացարձակապես համընկնում են»։ Եզրափակելով իր խոսքը՝ Լարիսա Ալավերդյանը փորձագիտական համայնքին և իրավապաշտպան կազմակերպություններին կոչ է արել իրական, այլ ոչ թե ձևական համագործակցության՝ վստահություն հայտնելով, որ փորձագետների խանդավառությունը կբավարարի անկեղծ երկխոսության նոր հարթակ ստեղծելու համար, որը կախված չի լինի միջազգային հարթակների կոնյունկտուրայից։