Նախընտրելի
Վիսկոնսին նահանգի նահանգապետի պաշտոնի Հանրապետական կուսակցության թեկնածու, կոնգրեսական Թոմ Թիֆանին և ինքնաթիռի օդաչուն թեթև վնասվածքներ են ստացել այն բանից հետո, երբ օդանավը կորցրել է հզորությունը և նահանգի կենտրոնական հատվածում գտնվող լճի վրա վթարային վայրէջք կատարել։ Ջրի վրա վայրէջքից հետո նրանք դուրս են եկել ինքնաթիռից և լողալով հասել ծանծաղուտ։
«Այսօր երեկոյան Լա Կրոս շրջանի Լինքոլնի օրվան նվիրված ընթրիքից տուն վերադառնալիս այն ինքնաթիռը, որով ես թռչում էի, Վաուսաուի օդանավակայանին մոտենալիս կորցրեց հզորությունը։ Օդաչուն Վաուսաու լճի վրա վթարային վայրէջք կատարեց», — գրել է Թիֆանին X սոցցանցում։
Ըստ նրա, վայրէջքից հետո նրանք զանգահարել են 911 ծառայություն։ Երբ ինքնաթիռը սկսել է ջրի տակ անցնել, Թիֆանին և օդաչուն լքել են սրահը և լողալով հասել ծանծաղուտ, որտեղ սպասել են փրկարարների ժամանմանը։
Փրկարարները նրանց նավակով հասցրել են ափ, որից հետո երկուսին էլ տեղափոխել են Aspirus Wausau հիվանդանոց։ Թիֆանին նշել է, որ այնտեղ բժշկական օգնություն է ստացել և շնորհակալություն հայտնել բժիշկներին։ Նա հայտնել է, որ ինքը և օդաչուն թեթև վնասվածքներով են պրծել։
Թիֆանին, որին աջակցել է ԱՄՆ նախագահ Դոնալդ Թրամփը, ԱՄՆ Ներկայացուցիչների պալատում ներկայացնում է Վիսկոնսինի 7-րդ ընտրատարածքը։ Օգոստոսին նա հաղթել է հանրապետականների նախնական ընտրություններում և դարձել նահանգապետի ընտրություններում կուսակցության թեկնածուն, գրում է Reuters-ը։
Նոյեմբերի 3-ի ընտրություններում Թիֆանին պետք է մրցի Դեմոկրատական կուսակցության թեկնածու Դևիդ Քրոուլիի հետ, որը Միլուոքի շրջանի գործադիր տնօրենն է։
Քրոուլին հայտարարել է, որ ուրախ է, որ միջադեպի հետևանքով ոչ ոք լուրջ վնասվածքներ չի ստացել։ Նա նաև շնորհակալություն է հայտնել օդաչուին՝ նշելով, որ նրա գործողությունները օգնել են կանխել հնարավոր ողբերգությունը։
