Լեհաստանում ձերբակալել են 46-ամյա մի տղամարդու, որին կասկածում են ինտերնետում վարչապետ Դոնալդ Տուսկի և իշխանության մյուս ներկայացուցիչների սպանության կոչեր հրապարակելու մեջ, հաղորդում է Polsat News-ը:

Դա առանձին գործ է և անմիջականորեն կապված չէ 66-ամյա տղամարդու ձերբակալության հետ, որին ավելի վաղ կասկածել էին Տուսկի և ազգային պաշտպանության նախարար Վլադիսլավ Կոսինյակ-Կամիշի վրա հարձակման նախապատրաստման մեջ։

Օբորնիկի քաղաքի բնակչի ձերբակալության մասին հայտնել է Լեհաստանի կառավարության ներկայացուցիչ Ադամ Շլապկան։ Դատախազության տվյալներով՝ տղամարդուն մեղադրանք է առաջադրվել սպանության կոչերի և Տուսկի, Սեյմի մարշալ Վլոդզիմեժ Չաժաստիի և TVP Info հեռուստաալիքի լրագրողի հասցեին վիրավորանքներ հնչեցնելու համար։

Բացի դրանից, նրան մեղադրում են պատգամավոր Կշիշտոֆ Պաշիկին, Լեհաստանի նախկին նախագահ Լեխ Վալենսային և պաշտպանության նախարարության ղեկավար Վլադիսլավ Կոսինյակ-Կամիշին վիրավորելու մեջ։

Ըստ Օբորնիկիի շրջանային դատախազության ղեկավար Կատաժինա Սիլ-Շուլչինսկայի՝ կասկածյալը օգոստոսից ի վեր նմանատիպ նյութեր էր հրապարակում Facebook-ում և TikTok-ում։ Հարցաքննության ժամանակ նա խոստովանել է, որ պետական գործիչների հասցեին վիրավորական արտահայտություններ է հրապարակել, սակայն հերքել է նրանց սպանության կոչերի վերաբերյալ մեղադրանքը։ Տղամարդը հայտարարել է, որ զղջում և ափսոսում է։ Նախկինում նա քրեական պատասխանատվության չի ենթարկվել։

Գործով դատական որոշում առայժմ չկա։ Կասկածյալի նկատմամբ սահմանվել է ոստիկանական հսկողություն, նրան արգելվել է զանգվածային լրատվության միջոցներում վիրավորական նյութեր հրապարակել և երկրից դուրս մեկնել։ Տղամարդուն սպառնում է մինչև երեք տարվա ազատազրկում։

Ավելի վաղ՝ կիրակի օրը, լեհական հատուկ ծառայությունները տեղեկություն էին ստացել Տուսկի և Կոսինյակ-Կամիշի վրա հնարավոր հարձակման մասին։ Դրա հետ կապված Ներքին անվտանգության գործակալության Հակաահաբեկչական կենտրոնում տեղի է ունեցել արտակարգ խորհրդակցություն։ Նույն օրը Ստորին Սիլեզիայի վոևոդությունում ձերբակալել են 66-ամյա մի տղամարդու, որին կասկածում են հարձակման նախապատրաստման մեջ։ Լեհական լրատվամիջոցների հաղորդմամբ՝ ստուգվում են արմատական շրջանակների հետ նրա հնարավոր կապերը։

Այս իրադարձությունների ֆոնին Կոսինյակ-Կամիշը հայտարարել է, որ լեհ քաղաքական գործիչները պարբերաբար սպառնալիքներ են ստանում էլեկտրոնային փոստով և սոցիալական ցանցերում։ Նա միաժամանակ կոչ է արել ավելի ակտիվորեն պայքարել ինտերնետային հետապնդման դեմ և հանդես է եկել 16 տարեկանից փոքր երեխաների համար սոցիալական ցանցերի հասանելիությունը սահմանափակելու օգտին։