ԱՄՆ-ի նախագահ Բարաք Օբաման իրեն եւ իր ընտանիքը պաշտպանող ԱՄՆ-ի Գաղտնի ծառայության նոր ղեկավար է նշանակել: Պատմության մեջ առաջին անգամ այդ պաշտոնը կին է զբաղեցնում` Ջուլիա Փիրսոնը:

«Ինտերֆաքսը» հայտնում է, որ բացի գործող նախագահի եւ պետության նախկին ղեկավարների պաշտպանությունից` ԱՄՆ-ի Գաղտնի ծառայությունը հետաքննում է նաեւ որոշ ֆինանսական հանցագործություններ:

Գերատեսչության նախկին ղեկավար Մարկ Սալիվանը հրաժարական էր տվել անցյալ ամիս մի քանի սկանդալներից հետո, որոնցից ամենաաղմկոտը տեղի էր ունեցել Կարթագենում` Արեւմտյան  կիսագնդի երկրների գագաթաժողովի ընթացքում, երբ բացահայտվել էին Գաղտնի ծառայության մի քանի գործակալների կապերը մարմնավաճառների հետ: Այժմ ԱՄՆ-ի Գաղտնի ծառայության նոր ղեկավարը պետք է վերականգնի գերատեսչության հեղինակությունը: 

Ջուլիա Փիրսոնն իր կարիերան սկսել է Մայամիի Գաղտնի ծառայությունում  որպես շարքային գործակալ ծառայելուց եւ հասել է մինչեւ շտաբի պետի դիրքի: