ՆախընտրելիՄարտի 23-ին վախճանված նախկին օլիգարխ Բորիս Բերեզովսկիի մարմնի հետագա պաթոլոգանատոմիական հետազոտությունը կշարունակվի եւս ութ շաբաթ: Այդ մասին ԻՏԱՌ-ՏԱՍՍ-ին հայտնել են Թեմզայի շրջանի ոստիկանության բաժանմունքում:
Ապրիլի 1-ին ռուսական «Դոժդ» հեռուստաալիքը տեղեկություն էր տարածել, որ գործարարի հուղարկավորությունը տեղի կունենա Լոնդոնում` Հանեսբերի գերեզմանատանը, սակայն ամսաթիվը մինչ այժմ հայտնի չէ: Հանգուցյալի ընտանիքին մոտ կանգնած աղբյուրը հեռուստաալիքին հայտնել է, որ տվյալ որոշումը կայացրել են նրա երեխաները` Ելիզավետան եւ Եկատերինան:
Գործի հետաքննությամբ զբաղվող ոստիկանությունում ԻՏԱՌ-ՏԱՍՍ-ին հայտնել են, որ իրենք տեղեկացված չեն եղել, թե որտեղ եւ երբ է տեղի ունենալու Բերեզովսկիի հուղարկավորությունը: Գործարարի շրջապատի անձինք նույնպես չեն կարողացել հաստատել Հանեսբերի գերեզմանատանը նրա հուղարկավորության մասին տեղեկությունը:
Հիշեցնենք, որ 67-ամյա գործարար Բերեզովսկիի մարմինը հայտնաբերվել էր մարտի 23-ին` Ասկոտ քաղաքի իր տան ներսից փակ լոգարանում՝ իսրայելցի թիկնապահ-վարորդ Ավի Նավամի կողմից: Ոստիկանությունը նշում է նրա մահվանը օտար անձանց մասնակցության բացակայությունը:
