նախընտրելի դարձնելԲրիտանական հայտնի հիվանդանոցները հայտնվել են մարդկային օրգանների հետ կապված սկանդալում: Sun-ի լրագրողները պարզել են, որ մահացած մարդկանց կենսական կարեւորություն ունեցող հարյուրավոր օրգաններ տարիներով պահվել են բուժհաստատություններում` առանց վախճանված հիվանդների հարազատների թույլտվության:
Հարազատներին ընդհանրապետ ոչինչ չեն ասել օրգանները հանելու մասին (այդ թվում նաեւ երեխաների): Այդ ամենը գաղտնի է պահվել 20 տարվա ընթացքում: Եվ միայն այժմ Լոնդոնի խոշորագույն Guy’s եւ St Thomas’ հիվանդանոցների աշխատակիցները կապվում են ընտանիքների հետ եւ հայտնում ցնցող տեղեկություններ:
Հաղորդվում է, որ բժիշկները մարմնի մասերը հանել են հետազոտությունների համար` Լոնդոնի Թագավորական քոլեջին կից դատաբժշկական փորձաքննության բաժնում: Սակայն 2000թ. բաժինը փակվել էր, իսկ օրգանները պահպանության էին հանձնվել Guy’s եւ St Thomas’ հիվանդանոցներին: Այնտեղ դրանց մասին պարզապես մոռացել էին: Իսկ հիվանդների հարազատներին չէին տեղեկացրել:
«Անտեր» օրգանների մասին հայտնի է դարձել միայն այն բանից հետո, երբ հիվանդանոցների ղեկավարությունը ստուգումներ է սկսել, որոնց ընթացքում հայտնաբերվել են վախճանված հիվանդներին պատկանող շուրջ 500 օրգաններ: Դրանց մի մասը պահվել էին 1992թ.-ից, հայտնում է vesti.ru-ն:
Լինդա Դորոբան մահացել էր 45 տարեկանում` ուղեղի արյունահոսությունից: Դա տեղի էր ունեցել 1996թ. Սուրբ Ծննդին: Այն մասին, որ իր մեռած մոր ուղեղն են «հափշտակել», Լինդայի որդի Դարենը չի իմացել, քանի դեռ իրեն չեն վերադարձրել օրգանը: Այժմ Դարենն այլ տուժածների հետ հուսով է դատարանի միջոցով հասնել փոխհատուցման:
