Նախընտրելի«ԱրմենՏել» ընկերությունը (ապրանքանիշը Beeline) հայտարարում է «Beeline Scholarship» ծրագրի երկրորդ փուլի մեկնարկի մասին: «Beeline Scholarship» ծրագիրն իրականացվում է Բրիտանական խորհրդի հայաստանյան մասնաճյուղի, ՀՀ ԿԳ նախարարության հետ համատեղ եւ նպատակ ունի աջակցել Հայաստանի պետական ԲՈՒՀ-երի վճարովի համակարգում սովորող ուսանողներին:
Ծրագրի երկրորդ փուլին, որը մեկնարկել է այսօր եւ կընթանա մինչեւ հունվարի 24-ը, Հայաստանի Հանրապետության Կրթության եւ Գիտության նախարարության, միջազգային, կրթական եւ բիզնես կազմակերպությունների ներկայացուցիչներից, այդ թվում նաեւ կրթական ոլորտում առաջատար փորձագետներից կազմված հանձնաժողովն առաջին փուլն անցած 179 մասնակցից կընտրի այն 80-110 ուսանողին, ովքեր կարժանան «Beeline կրթաթոշակ»-ին:
«Beeline Scholarship» ծրագիրը լայն արձագանք գտավ հանրապետության ողջ տարածքում։ Այսօր, առավել քան երբեւիցե, անգնահատելի է կրթության դերը ժամանակակից աշխարհում եւ մենք, որպես սոցիալապես պատասխանատու ընկերություն շարունակելու ենք աջակցել կրթական ծրագրերի իրակակացմանը եւ խրախուսել հայ երիտասարդներին իրենց սեփական ուժերով հասնել հաջողության եւ կյանքը դարձնել ավելի լավ»,- նշեց «ԱրմենՏել» ընկերության Գլխավոր տնօրեն Անդրեյ Պյատախինը:
«Մենք ուրախ ենք համագործակցել «ԱրմենՏել» ընկերության հետ այս ծրագրի շրջանակում եւ աջակցել այն ուսանողներին, ովքեր կքայլեն ժամանակակից աշխարհի պահանջներին համահունչ եւ կներկայացնեն ստեղծարար եւ նորարար մտքեր»,-ասաց Բրիտանական խորհրդի հայաստանյան մասնաճյուղի տնօրեն Արեւիկ Սարիբեկյանը:
«Beeline Scholarship» ծրագիրն իրականացվում է երկու հիմնական փուլով: Առաջին փուլին մասնակցել է ավելի քան 550 ուսանող, որոնց մեջ գերակշռում են տնտեսագիտություն, բիզնես կառավարում եւ լեզվաբանության ոլորտում սովորող ուսանողները: Երկրորդ փուլ անցած բոլոր ուսանողները հանձնաժողովին կներկայացնեն իրենց ծրագիր առաջարկը տեսանյութի կամ պատկերացույցի միջոցով, որից հետո հանձնաժողովը կկայացնի իր որոշումը:
Նշենք, որ «Beeline Scholarship» ծրագիրը մեկնարկել է 2013 թվականի նոյեմբերի 25-ից եւ իրականացվում է Հայաստանի Հանրապետության ողջ տարածքում: Ծրագրի շրջանակում ԱրմենՏել ընկերությունը շուրջ 100 հայ ուսանողի կտրամադրի կրթաթոշակ` վճարելով նրանց մեկ կիսամյակի ուսման վարձը: Հաղթող ուսանողների շրջանակում Բրիտանական խորհուրդը նաեւ կանցկացնի խաղարկություն, որի արդյունքում նրանցից մեկը հնարավորություն կունենա մեկնելու Միացյալ Թագավորություն եւ մասնակցելու դասընթացի:
