նախընտրելի դարձնելՀունվարի 22-ի առավոտյան Ուկրաինայի մայրաքաղաք Կիեւի կենտրոնական Գրուշեւսկայա փողոցում իրավիճակը սրվել է, թեեւ գիշերը խաղաղ էր անցել:
Առավոտյան հինգ անց կեսի սահմաններում ուժայինների վրա Մոլոտովի կոկտեյլներ են նետել: Քսան րոպե անց վերջիններս պատասխանել են` բարիկադների վրա կրակելով եւ այնտեղ գտնվող մարդկանց ուղղությամբ գազային նռնակներ նետելով, հայտնում է cenzor.net-ը` վկայակոչելով lb.ua-ը:
ՆԳՆ-ն մի քանի ուժեղ լուսարձակներ է վառել, «բերկուտցիները» կրակում են` կողմնորոշվելով դրանց լույսով: Կրակոցները հիմնականում դիպչում են խաղաղ ցուցարարների հետին շարքերին, գազը շատ է», - հավելել են ականատեսները:
«Լարվածությունն աճում է, սակայն պատնեշների եւ ոստիկանների միջեւ դեռ ակտիվիստներ կան կանգնած, որոնք փորձում են կանխել բախումները», - հաղորդվում է Եվրամայդանի ֆեյսբուքյան էջում:
Հաղորդվում է նաեւ, որ ընդդիմադիրները շարունակում են «տիտուշկաների» «որսը»:
Ըստ Վիկիպեդիայի` «Տիտուշկաներ» են ասում այն երիտասարդներին, որոնք օգտագործվում են որպես վարձկաններ` ընդդիմադիր քաղաքական կուսակցությունների եւ կազմակերպությունների դեմ ֆիզիկական ուժ գործադրելու համար:
