նախընտրելի դարձնելԿառավարությունը «Զվարթնոց» օդանավակայանի հին շենքի քանդման որոշում չի կայացրել, հունվարի 23-ի մամուլի ասուլիսում հայտարարել է Հայաստանի Ճարտարապետների միության նախագահ Մկրտիչ Մինասյանը:
Անդրադառնալով Քաղավիացիայի վարչության պետ Արտյոմ Մովսեսյանի միանգամայն հակադիր հայտարարությանը՝ նա նշել է, թե շատ հնարավոր է՝ «Քաղավիացիայի վարչության պետը նման բուռն ցանկություն ունի»:
«Կարծում եմ՝ նա պարզապես իր կարծիքն է հայտնել՝ հանրության արձագանքը տեսնելու համար: Այնպիսի տպավորություն ունեմ, թե միայն Քաղավիացիայի վարչությանն է մտահոգում շենքի քանդման հարցը», - ասել է Մինասյանը եւ հավելել, որ ոչ ոք քանդման թույլտվություն չի տվել:
Ի պատասխան հարցին՝ ինչով է պայմանավորված Քաղավիացիայի վարչության պետի նման ցանկությունը, Ճարտարապետների միության նախագահը նշեց, որ դա բացատրվում է շենքի պահպանման խոշոր ծախսերով:
«Նրանք պարզապես ցանկանում են ազատվել գլխացավանքից: Արդեն մեկ տարի է՝ Ճարտարապետների միությունն ասում է, որ չի կարելի քանդել շենքը, քանի որ այն ճարտարապետական արժեք է, խորհրդային մոդեռնիզմի լավագույն նմուշն է եւ մասնագետների շատ բարձր գնահատականի է արժանացել»,- ասել է Մինասյանը՝ ընդգծելով, որ վերջին 10 տարում կարելի էր շենքի գործածականության համար բազմաթիվ տարբերակներ մտածել:
