«Կոշ» քրեակատարողական հիմնարկի դատապարտյալները դժգոհում են դատապարտյալների պայմանական վաղաժամկետ ազատման գործընթացից, որը,  ըստ նրանց չի գործում: Այս մասին NEWS.am-ին հղած նամակում նշել է «Կոշ» քրեակատարողական հիմնարկի դատապարտյալ Ռուբեն Ամատունին՝ հավաստիացնելով, որ դատապարտյալների մեծամասնությունը միանում են այդ բողոքին: 

Նա  փորձել է դժգոհությունը իր պատմությամբ հիմնավորել: Ամատունին նշել է, որ դատապարտված է ՀՀ քրեական օրենսգրքի 175 հոդվածի 1-ին մասով, 34-176 հոդվածի 1-ին մասով, 35-176 հոդվածի 2-րդ մասով: Իսկ պատժի սկիզբը հաշվում է 2010թ-ից: «Չունեմ նախկին դատվածություն, տուժողի քաղհայց,  բողոք իմ դեմ, այլ հակառակը արժանացել եմ երկու խրախուսանքի`  վարքի եւ հանրօգուտ միջոցառումների մասնակցելու համար: Երկու անգամ է իմ պայմանական վաղաժամկետ ազատման հարցը քննվել: Վերջին անգամ 2013թ. հոկտեմբերին, սակայն կրկին մերժեցին»,- դժգոհել է դատապարտյալը: 

Նրա փոխանցմամբ՝ շատ դատապարտյալների մոտ արդեն նկատվում է հոգեկան շեղվածության ախտանիշներ: «Իսկ Արդարադատության նախարարությունը եւ իրավապաշտպանները, ՄԻՊ-ը  ոչինչ չեն անում իրավիճակը շտկելու համար: Մեզ օգտագործում են  որպես թրաֆիկինգի  առարկաներ  հանդիսացող  շրջանառու միջոցներ: Եթե այդպես շարունակի շատերիս կյանքն է  խեղվելու»,-ահազանգել է դատապարտյալը: