Հայաստանի Զինված ուժերին գոմեշի մսի մատակարարման փաստի առթիվ ՀՀ ՊՆ քննչական ծառայության ՀԿԳ քննչական բաժնում հարուցված քրեական գործի նախաքննությունն ավարտման փուլում է: Այս մասին հայտնեցին NEWS.am-ի աղբյուրները:

Դա նշանակում է, որ առաջիկայում գործը կուղարկվի դատարան: Գործի շրջանակներում մեղադրյալի կարգավիճակում գտնվող  բոլոր 4 անձինք այժմ ազատության մեջ են, նրանց խափանման միջոցը փոխվել էր եւ ընտրվել էր ստորագրություն քաղաքից չբացակայելու մասին: Մասնավորապես, ազատության մեջ են «Ա.Օհանջանյան» ՍՊԸ տնօրեն Ալբերտ Անդրանիկի Օհանջանյանը, N զորամիավորման պարենային ծառայության պետը (կոչումով փոխգնդապետ), N զորամասի հրամանատարը (կոչումով փոխգնդապետ) եւ նրա նյութատեխնիկական գծով տեղակալը: Իսկ ավելի վաղ ստորագրություն քաղաքից չհեռանալու մասին խափանման միջոց էր ընտրվել նաեւ նույն զորամասի պահեստարանի պետին:

Ավելի վաղ տեղեկացրել էինք, որ Բանակի պարենային պահեստում կատարված ստուգումների արդյունքում գոմեշի մսի հայտնաբերման փաստով հարուցված քրեական գործի շրջանակներում Ալբերտ Անդրանիկի Օհանջանյանի դեմ մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով՝ խարդախություն, որը կատարվել է առանձնապես խոշոր չափերով: Սույն հոդվածը պատժվում է ազատազրկմամբ 4-8 տարի ժամկետով: Վերջինս  սրտի կաթված է տարել եւ «Դատապարտյալների հիվանդանոց» ՔԿՀ-ում բուժում էր ստանում: Դրանից հետո գործի շրջանակններում կալանավորվեցին եւս երեք անձինք: Մեղադրյալների թիվը 5 էր, նրանցից մեկի նկատմամբ խափանման միջոց էր ընտրվել ստորագրություն քաղաքից չբացակայելու մասին: Ավելի ուշ մնացածների խափանման միջոցը եւս փոխվեց: Լրատվամիջոցներում շատ էր հոլովվում ԶՈՒ շտաբի պետի տեղակալ Արշալույս Փայտյանի անունը, ով կեղծել էր մատակարարման համար անհրաժեշտ փաստաթղթերը, սակայն նա այդպես էլ քրեական պատասխանատվության չի ենթարկվել։