նախընտրելի դարձնելՆոյեմբերի 11-ին Քուվեյթի առողջապահության նախարար, դոկտոր Ալի Սաադ Ալ-Օբեյդին ընդունեց Քուվեյթում ՀՀ դեսպան Ֆադեյ Չարչօղլյանին:
ԱԳՆ մամուլի ծառայությունից հայտնում են, թե կողմերը քննարկեցին Հայաստանի եւ Քուվեյթի միջեւ առողջապահության եւ բժշկագիտության բնագավառներում համագործակցության ընդլայնման ուղիները:
Դեսպան Չարչօղլյանը կարեւորեց Հայաստանի եւ Քուվեյթի առողջապահության նախարարությունների միջեւ համագործակցության փաստաթղթի ստորագրումը եւ նշեց, որ դա նոր լիցք կհաղորդի վերոնշյալ ոլորտում դրական առաջընթացի ապահովմանը:
Անդրադարձ կատարվեց մասնագետների փոխանակման եւ վերապատրաստման դասընթացների կազմակերպման հեռանկարներին:
Երկուստեք ընդգծվեց առողջապահության բնագավառում գիտական փոխգործակցություն ծավալելու, համատեղ գիտական համաժողովներ կազմակերպելու եւ դասախոսություններով հանդես գալու, ինչպես նաեւ տարաբնույթ հարցերի եւ խնդիրների շուրջ խորհրդատվական տեղեկատվություն փոխանակելու կարեւորությունը:
Մինչ այդ, նոյեմբերի 10-ին դեսպան Չարչօղլյանը հանդիպում ունեցավ հայ-քուվեյթյան միջխորհրդարանական բարեկամության խմբի ղեկավար Ֆայսալ Ալ-Շայայի հետ:
Հանդիպման ընթացքում քննարկվեց խորհրդարանական գործակցության ոլորտում ձեռք բերված պայմանավորվածությունների կատարման ընթացքն ու բարձրաստիճան պատվիրակությունների փոխայցելությունների ակտիվացման հնարավորությունները:
