նախընտրելի դարձնել«Նաիրիտ» գործարանի աշխատակիցներն այսօր՝ դեկտեմբերի 5-ին, կրկին բողոքի ակցիա են անցկացնում, այս անգամ՝ գործարանի տարածքում՝ պահանջելով հանդիպում գործարանի տնօրենի հետ:
Այս մասին NEWS.am-ի հետ զրույցում ասաց «Նաիրիտի» արհմիության նախագահ Հրաչ Թադեւոսյանը:
«Այս պահին աշխատակիցներով հավաքված ենք գործարանի մոտ, սպասում ենք տնօրենին, որպեսզի մեր հարցերին պատասխանի՝ տեսնենք մեր ճակատագիրը ինչ է լինելու», -ասաց նա:
Արհմիության նախագահի խոսքով՝ իրենք դեռ չգիտեն՝ ինչ քայլերի են դիմելու, իրենց անելիքները տնօրենի հետ հանդիպումից հետո են որոշելու:
Նշենք, որ երեկ նաիրիտցիները բողոքի ակցիա էին կազմակերպել նախագահական նստավայրի մոտ՝ նամակ փոխանցելու եւ պահանջելու ՝ աշխատավարձերի ամբողջական վճարում եւ աշխատակիցներին աշխատանքից հեռացնելու ծանուցագրերի գործընթացի կասեցում:
«Նաիրիտ» գործարանի աշխատակիցները չեն հավատում, որ իշխանությունները կատարելու են իրենց խոստումը եւ վճարելու են իրենց աշխատավարձերի պարտքը, որը կազմում է մոտ 15 մլն դոլար։
Հիշեցնենք, որ «Նաիրիտի» աշխատակիցների աշխատավարձը մարվում է պետական էներգետիկ ընկերությունների՝ Երեւան ՋԷԿ-ի եւ Որոտանի ՀԷԿ-ի եկամտի հաշվին:
