Հուլիսի 18-ին ոստիկանության Մասիսի բաժնի ծառայողները օպերատիվ տեղեկություն են ստացել, որ 56-ամյա Հայրիկ Վ.-ն իր մոտ եղած դեղատուփի մեջ թմրանյութ է պահում:

Ոստիկանության մամուլի ծառայությունից հայտնում են, որ ձեռնարկված օպերատիվ-հետախուզական միջոցառումների արդյունքում Հայրիկ Վ.-ն հայտնաբերվել է Այնթապ գյուղի վերջնամասում գտնվող գազալցակայանի մոտ: Նա իր մոտ եղած տուփը դեն է նետել եւ փորձել փախչել, սակայն ոստիկանության ծառայողների կողմից փախուստը կանխվել է:

Կատարված արձանագրությամբ Հայրիկ Վ.-ի նետած դեղահաբի տուփը զննվել է, որի մեջ առկա է եղել յուրահատուկ սուր հոտով կիսաչոր, մանրացված կանեփանման զանգված:

Հայրիկ Վ.-ն հայտարարել է, որ նշված զանգվածն իրենն է, ձեռք է բերել Այնթապ գյուղի դաշտերից եւ պահում է իր մոտ` որպես թմրանյութ իր օգտագործման համար:

Հայրիկ Վ.-ի կողմից մատնացույց արված դաշտից արմատախիլ է արվել 1 կգ 130 գ կշռով 8 բույս:

Հայտնաբերվածն ուղարկվել է ԴՔՓ:

Նախապատրաստվում են նյութեր: