ՆախընտրելիԴեկտեմբերի 14-ին եւ լույս 15-ի գիշերը ղարաբաղա-ադրբեջանական հակամարտ զորքերի շփման գծում հակառակորդի կողմից հրադադարի պահպանման ռեժիմը խախտվել է շուրջ 150 անգամ, որի ընթացքում, տարբեր տրամաչափի հրաձգային զինատեսակներից, ինչպես նաեւ 60 /130 արկ/, 82 /13 արկ/ միլիմետրանոց ականանետերից, ՀԱՆ-17 /40 արկ/ եւ ՌՊԳ-7 /6 արկ/ տիպի նռնականետերից, հայ դիրքապահների ուղղությամբ արձակվել է ավելի քան 1700 կրակոց:
ԼՂՀ ՊԲ մամուլի ծառայությունից հայտնում են, որ հրադադարի ռեժիմի խախտման արդյունքում՝ պաշտպանության բանակը կորուստ չի ունեցել:
ՊԲ առաջապահ զորամասերը առաջնագծում իրենց կամքն են թելադրում հակառակորդին եւ շարունակում վստահորեն իրականացնել մարտական հերթապահություն:
ԼՂՀ ՊԲ մամուլի ծառայությունն անդրադարձել է նաեւ Ադրբեջանի կողմից տարածվող ապատեղեկատվությանը՝ նշելով.
«Երեկ Ադրբեջանի պաշտպանության նախարարությունը հերթական անգամ ապատեղեկատվություն էր տարածել, թե իբր ոչնչացվել է հայերի կրակակետ, ինչի արդյունքում երեք հայ զինծառայող է զոհվել: ԼՂՀ պաշտպանության նախարարության մամուլի ծառայությունը, այս անգամ որեւէ մեկնաբանության չարժանացնելով ադրբեջանական քարոզիչների վառ երեւակայության արգասիքը, ներկայացնում է ադրբեջանցի օգտատերի՝ նշված նյութին առնչվող կարծիքն առանց փոփոխության.
«Ի՞նչքան է այս սուտը հոգնեցրել: Տեսանյութում երեւում է պայթեցված թաքստոց: Ես հարց ունեմ. ո՞րտեղից են վերցրել երեք զինվորի մասին թիվը: Մեր պաշտպանության նախարարությունը չի հասկանում, որ անհիմն հայտարարություններով խաթարում է ժողովրդի հավատը… Պետք է խոսել ՓԱՍՏԵՐՈՎ, ոչ թե ենթադրություններով (Bozqurd Sonuna Qədər Türk как вся эта ложь надоела??? Из видео видно-подорвано укрытие.у меня вопрос:откуда взята цифра 3 солдата?Наше МО не понимает,что безосновательными заявлениями подрывает веру народа… нужно говорить Ф А К Т А М И,а не домыслами!)»:
