2015-ի 9 ամիսների ընթացքում Հայաստանում  փակված ամեն 3 ձեռնարկության դիմաց  5-ից ավելին է բացվել:  Ինչպես դեկտեմբերի 24-ին լրագրողներին հայտնել է Հայաստանի Էկոնոմիկայի նախարարության Փոքր եւ միջին բիզնեսի զարգացման վարչության պետ  Արամ Օհանյանը, եթե  2015-ի հունվար-սեպտեմբերին հանրապետությունում   7 639 ձեռնարկություն է փակվել, ապա բացվել է 13 131-ը: Դրանց հիմնական մասը  (բացվածների մոտ 80 տոկոսը եւ փակվածների 96 տոկոսը) անհատ ձեռներեցներ են:  

Դրական դինամիկա էր արձանագրվել նաեւ  2014-ին, փակվել էր 9 454 ձեռնարկություն, բացվել էր` 16 967-ը: Իսկ ընդհանուր առմամբ 2011-14-ին եւ  2015-ի առաջին  9 ամիսների ընթացքում հանրապետությունում ամեն փակված 2 ձեռնարկության դիմաց  3-ն է բացվել  (50 850 եւ 75 486), հավելել է Օհանյանը:

Իր հերթին, ներդրումային քաղաքականության վարչության պետ Վահագն Լալայանը նշել է, որ ամբողջ աշխարհում  5-ամյա տարեդարձը տոնում է ձեռնարկությունների միայն   10 տոկոսը: «Այնպես որ, ձեռնարկություններ փակվում են ոչ միայն Հայաստանում», - նշել է նա: