Եվրասիական տնտեսական միությունում դեռ շատ անելիքներ կան էներգակիրների, ֆինանսական ծառայությունների ու մի շարք այլ զգայուն հարցերում բոլոր խոչընդոտներն ու սահմանափակումները վերացնելու համար: Այս մասին հայտարարել է Ալեքսանդր Լուկաշենկոն, ապրիլի 21-ին  Բելառուսի ժողովրդին ու խորհրդարանին հասցեագրված իր ամենամյա ուղերձում: 
Ընդ որում ԱՊՀ-ի վերաբերյալ Բելառուսի նախագահի տեսակետներն ավելի հոռետեսական են. «Չնայած  ԵՏՄ-ում նույնպես  բավականին շատ խնդիրներ կան, բայց ի տարբերություն ԵՏՄ-ի՝ ԱՊՀ-ում սկսված գործընթացների միտումները, ցավոք, շատ ավելի բացասական են»: 
«Անդամների քանակը կրճատվում է, որոշ երկրների միջեւ հարաբերությունները սրվում են, ինչի մասին է վկայում Ադրբեջանի ու Հայաստանի միջեւ վերջերս սրված հակամարտությունը: Նույնիսկ ԱՊՀ –ն լուծարելու առաջարկներ են հնչում»,- նշել է Լուկաշենկոն: 
Նրա խոսքով, կիսելով Համագործակցությունը արդիականացնելու անհրաժեշտության մասին տեսակետը, Բելառուսը անհրաժեշտ է համարում պահպանել այն որպես միջազգային կազմակերպություն: 
«Մեր կարծիքով արդիականացման խնդիրն է ԱՊՀ-ն դարձնել ավելի ուժեղ ու գրավիչ մասնակից պետությունների համար, ադապտացնել այն ժամանակակից իրողություններին»,- հայտնել է պետության ղեկավարը, հայտնում է «ԲելաՊԱՆ»-ը: