Հուլիսի 11-19-ին Հայաստանում պարապլանային սպորտի միջազգային մրցումներ կընթանան: Այդ մասին հուլիսի  10 –ին լրագրողներին հայտնել է Հայաստանի պարապլանային սպորտի ասոցիացիայի նախագահ Արմեն Սարգսյանը: 

Մրցությունները կընթանան Թեղենիս լեռան մոտ (2 851 մ), Հայաստանի Կոտայքի եւ Սյունիքի մարզերի սահմանագծին:

Դրանց 25 երկրից մոտ 180  մարդ կմասնակցի: Նրանցից կընտրվեն   150-ը, որոնք 2017-ին դարձյալ Հայաստան կգան մեկ կարգ ավելի բարձր մրցության, որը Պարապլանային սպորտի գավաթի 5 փուլերից մեկն է:

Հայ էնտուզիաստները միջազգային  մրցությունը հյուրընկալել են նաեւ   2015-ին: Այն ժամանակ դրա անցկացմանն աջակցել էր Թուրքիայից փորձառու մարզիկ: Այս տարի եւս ակնկալվում է թուրք մարզիկների մասնակցությունը: 

Պարապլանային սպորտով զբաղվողները մեկ ընտանիք են: Մենք քաղաքականությունից դուրս ենք եւ օգնում ենք իրար,-հայտնել է Սարգսյանը: 

«Հայաստանում թռչելը հարմարավետ է. նախ` լեռներ կան, երկրորդ` տարվա ընթացքում շատ են արեւային օրերը», - հավելել է նա:

Նա տրանսպորտով աջակցելու համար շնորհակալություն է հայտնել Հայաստանի Պաշտպանության նախարարությանը, իսկ ընդհանուր կազմակերպչական աջակցության համար` կառավարության աշխատակազմի ղեկավար, նախարար Դավիթ Հարությունյանին: «Գուցե ժամանակի հետ նա ցանկանա նաեւ իրեն փորձել մեր սպորտում», - հայտնել է Սարգսյանը: