Հռոմի Ֆրանցիսկոս պապը հավատացյալներին կոչ է արել զղջալ Աստծո արարման նկատմամբ գործած մեղքերի համար եւ գթասրտության ոգով վերաիմաստավորել  վերաբերմունքը «մեր ընդհանուր տանը» հայտնում է «ՌԻԱ Նովոստին»:   

«Աստված մեզ ծաղկուն այգի է նվիրել, իսկ մենք այն վերածում ենք ավերակներով, անապատներով եւ գարշելիությամբ լցված տարածության», — ասված է ուղերձում, որը քահանայապետը հղել է սեպտեմբերի 1-ին նշվող Աստծո արարման պաշտպանության վերաբերյալ Աղոթքի համաշխարհային կաթոլիկական օրվա կապակցությամբ: 

«Մենք չենք կարող նահանջել կամ անտարբեր լինել կենսաբազմազանության կորստի եւ էկոհամակարգերի ավերման հանդեպ, որոնց պատճառը հաճախ մեր անպատասխանատու եւ եսասիրական պահվածքն է», — ընդգծված է այդ փաստաթղթում: 

Ֆրանցիսկոս պապը մտահոգություն է հայտնել այն կապակցությամբ, որ «մոլորակը շարունակում է տաքանալ, մասնակիորեն` մարդկային ակտիվության պատճառով»: Նա հիշեցրել է, որ  2015 թվականն ամենաշոգ տարին էր օդերեւութաբանական դիտարկումների ամբողջ պատմության ընթացքում, իսկ ընթացիկ տարին, հավանաբար, կգերազանցի նրան:   «Դա երաշտներ, ջրհեղեղներ, հրդեհներ եւ այլ` գնալով ավելի սուր օդերեւութաբանական երեւույթներ է առաջացնում», — նշել է նա:

Հռոմի պապը նաեւ նշել է, որ կլիմայի փոփոխությունները նպաստում են  «տանջալից միգրացիոն ճգնաժամին», իսկ «աշխարհի աղքատները, որոնք ավելի փոքր պատասխանատվություն են կրում կլիմայական փոփոխությունների համար, առավել խոցելի են»:

Ֆրանցիսկոսն ընդգծել է, որ ժամանակակից հասարակությունում պետք է տիրապետի ոչ թե անմիջական ֆինանսական կամ ընտրական շահի փնտրտուքը, այլ համընդհանուր բարիքի հասնելու ձգտումը, որն իր մեջ ներառում է արարման պաշտպանությունը: 

Աստծո արարման պաշտպանության վերաբերյալ Աղոթքի համաշխարհային օրը հիմնադրվել է Ֆրանցիսկոս պապի կողմից` մեկ տարի առաջ, մոլորակի տնտեսական սուր ճգնաժամի հաղթահարման նպատակով:  Այսօր այն Հռոմի կաթոլիկ եկեղեցու կողմից նշվում է երկրորդ անգամ: