նախընտրելի դարձնելՀՀ նախագահ Սերժ Սարգսյանը Հնդկաստանի Հանրապետություն աշխատանքային այցի առաջին օրն ավարտվել է երեկոյան հայկական համայնքի ներկայացուցիչների հետ հանդիպմամբ:
ՀՀ նախագահի մամուլի գրասենյակից NEWS.am_ին հայտնում են, որ ՀՀ նախագահը ողջույնի խոսք է հղել հանդիպման մասնակիցներին, որում անդրադարձել է հայ-հնդկական պատմամշակութային առնչություններին, երկու ժողովուրդների դարավոր բարեկամության ամրապնդման գործում Հնդկաստանի հայ համայնքի մեծ դերին, Հայաստան-սփյուռք հարաբերություններին, հայրենիքի ու համայն հայության առջեւ ծառացած մարտահրավերներին եւ դրանց դիմակայելու հնարավոր ուղիներին, ինչպես նաեւ Հայաստանի կյանքում վերջին շրջանում տեղի ունեցած նշանակալի իրադարձություններին, այդ թվում` հանրաքվեի միջոցով կառավարման նոր` լիարժեք խորհրդարանական համակարգին անցնելուն:
Հանդիպման ընթացքում Սերժ Սարգսյանը պատասխանել է նաեւ համայնքի ներկայացուցիչներին հետաքրքրող հարցերին, լսել նրանց հաջողության պատմությունները, խնդիրները, դրանց լուծման հարցում հայրենիքից ակնկալիքները, ինչպես նաեւ համայնքային կյանքում նրանց գործունեության մասին: Համայնքի ներկայացուցիչների խնդրանքով, Նախագահ Սարգսյանը ներկայացրել է Հնդկաստանի բարձր ղեկավարության հետ այսօր իր ունեցած հանդիպումների ժամանակ քննարկված հարցերն ու ձեռքբերված պայմանավորվածությունները, որոնք միտված են առավել ամրապնդելու երկու բարեկամ երկրների եւ ժողովուրդների միջեւ պատմականորեն ձեւավորված կապերը:
Հանդիպման ժամանակ Նախագահը նշել է, թե հաճելի է տեսնել, որ հայ համայնքի ներկայացուցիչների հետ ներկա է նաեւ Երեւանի բժշկական համալսարանի շրջանավարտների միության նախագահ դոկտոր Դալջիթ Սինգհ Չաուհանը: Սերժ Սարգսյանը համոզվածություն է հայտնել, որ հայաստանյան բուհերի հնդիկ շրջանավարտների հոծ բազմությունը եւս մի բարեկամության կամուրջ է երկու երկրների միջեւ, որը պետք է ավելի ամրապնդվի ու ընդլայնվի:
Նախագահ Սարգսյանը ուրախությամբ է արձանագրել, որ Հնդկաստանում Հայաստանի դեսպանության հետ իր ջանքերն է միավորում նաեւ պատվո հյուպատոս Շիվկումար Իշվարանը, եւ հույս է հայտնել, որ նրանց համատեղ ձեռնարկներն արգասաբեր կլինեն:
«Բոլոր մարտահրավերներին դիմակայելու, մեր խնդիրները լուծելու ճանապարհին մենք պարտավոր ենք լինել միասնական: Մեր մեծ մտածողները մշտապես խոսել են միասնության մասին, եւ գաղտնիք չէ, որ մեր ժողովուրդը համարում է, որ մենք միասնական ենք լինում, երբ մեր հայրենիքին, մեր հողին վտանգ է սպառնում: Այսօր մեր խնդիրն է, որպեսզի այդ միասնականությունը տարածենք նաեւ հարաբերական խաղաղ պայմաններում, որովհետեւ մեր մարտահրավերները շատ սուր են, եւ դրանց դիմակայելը ավելի մեծ ջանքեր է պահանջում: Մենք ունենք ուժի մեծ աղբյուր, ունենք միասնության գաղափարը անհրաժեշտ, պարտադիր դարձնելու հանգամանքներ, դրանք են՝ անկախ Հայաստանը, ազատ Արցախը եւ մեր զորեղ սփյուռքը: Միշտ կրկնում ենք՝ Հայաստանն ուժեղ է սփյուռքով, սփյուռքը հավերժ է Հայաստանով»,-ողջույնի խոսքի ավարտին ընդգծել է Հանրապետության Նախագահը:
Հայ-հնդկական միջպետական հարաբերությունների օրակարգի եւ զարգացման հեռանկարի, առեւտրատնտեսական ոլորտում փոխգործակցության ներուժի, հայ եւ հնդիկ ժողովուրդների պատմամշակութային առնչությունների եւ մի շարք այլ հարցերի շուրջ Նախագահ Սերժ Սարգսյանն այսօր նաեւ հարցազրույց է տվել հնդկական «Դուրդարշան» պետական հեռուստաընկերությանը:
