նախընտրելի դարձնելՀայաստանի երիտասարդական հիմնադրամը հայտարարում է ՀՀ Նախագահի աշխատակազմի կողմից հատկացվող դրամաշնորհների մրցույթ:
Հայաստանի երիտասարդական հիմնադրամից NEWS.am-ին հայտնում են մրցույթի մանրամասները:
«Հայաստանի երիտասարդական հիմնադրամը` որպես ՀՀ Նախագահի կողմից ընտրված գործընկեր կազմակերպություն, հիմք ընդունելով ՀՀ Նախագահի 2008 թվականի մայիսի 19-ի թիվ ՆՀ-118-Ն հրամանագրով հաստատված «ՀՀ Պետական բյուջեից Նախագահի աշխատակազմին հատկացված միջոցները հասարակական կազմակերպություններին որպես դրամաշնորհներ հատկացնելու մասին» կարգը, հայտարարում է դրամաշնորհային մրցույթ հետեւյալ անվանակարգերով.
1. Մայիսյան հերոսամարտերի 100-ամյակ
1.1. Մայիսյան հերոսամարտերի պատմության ներկայացման միջոցով ՀՀ եւ Արցախի Հանրապետության զորամասերում ծառայող զինծառայողների ռազմահայրենասիրական ոգու բարձրացում
ԾԱՆՈԹՈՒԹՅՈՒՆ: Հայկական եւ թուրքական զորքերի թվաքանակ, զենքերի եւ զինամթերքի տեսականի, տեղաբաշխում: Հայկական զինվորական ղեկավարության ռազմավարական մտքի առանձնահատկություններ, տարբեր ազգերի ներկայացուցիչների մասնակցություն, ճակատամարտերի հերոսների ոգեկոչում:
1.2. Մայիսյան հերոսամարտերը՝ որպես հայկական պետականության կերտման գրավական: Հաղթական ոգի Եղեռնից հետո
1.3. Մայիսյան հերոսամարտերի արտացոլումը մշակույթում
2. Հայաստանի Առաջին Հանրապետության 100-ամյակ
2.1. Հայ հասարակական-քաղաքական միտքը հայոց պետականության վերակերտման մասին
2.2. Հայաստանի Առաջին Հանրապետության պետական գործիչներ, պետական շինարարության փորձ, գիտակրթական համակարգի ստեղծում եւ քաղաքական մշակույթ (խորհրդարանական համակարգ, կանանց եւ ազգային փոքրամասնությունների իրավահավասարություն)
3. Հայ զինվորի կերպարը մատաղ սերնդի դաստիարակության գործում
4. Էրեբունի-Երեւան 2800-ամյակ
Դրամաշնորհային ծրագրի շրջանակներում ներկայացված յուրաքանչյուր անվանակարգի համար հատկացվող գումարը չի կարող գերազանցել 1 000 000 (մեկ միլիոն) ՀՀ դրամը։ Նախապատվությունը կտրվի այնպիսի ծրագրերին, որոնք պարունակում են նորարարական մոտեցումներ, գործիքներ եւ առավել մեծ ազդեցություն կարող են ունենալ թիրախային խմբի վրա:
Մրցույթին մասնակցելու համար մրցութային հայտը պետք է ներկայացվի 2018թ. փետրվարի 2-ից մինչեւ 2018-ի մարտի 2-ը, ժամը 12:00, յուրաքանչյուր աշխատանքային օր` ժամը 11:00-16:00 (ընդմիջում՝ 13:00-14:00), Հայաստանի երիտասարդական հիմնադրամի` Տերյան 74 հասցեում գտնվող գրասենյակ»:
