Կուզբասի նախկին նահանգապետ Աման Տուլեեւն ընտրվել է ժողովրդական պատգամավորների մարզային խորհրդի նախագահ, հայտնում է Медуза-ն: 

Ապրիլի 10-ին խորհրդարանի արտահերթ նստաշրջանում նրա թեկնածության օգտին քվեարկել է 39 պատգամավորից 38-ը: Տուլեեւը խոսնակի պաշտոնում միակ թեկնածուն էր:

«Ես հիշեցի 90 թվականը: Ճիշտ այսպես: 250 պատգամավորներին, այս դահլիճը: Ես երկաթուղու պետն էի: Եվ ինձ ոչ ավելի, ոչ պակաս ընտրում են մարզային խորհրդի նախագահ: Ամեն ինչ վերադառնում է: Հետաքրքիր է՝ կյանքում այսպիսի շրջապտույտ է տեղի ունենում»,- ասել է Տուլեեւը նախագահ ընտրվելուց առաջ: «Մարզը ես նոր նահանգապետին եմ հանձնում հոյակապ, աշխատանքային վիճակով»,- հավելել է նա:

Աման Տուլեեւը Կեմերովոյի մարզը ղեկավարել է 1997 թվականից: 2018 թվականի ապրիլի 1-ին նա հրաժարական էր տվել: Դա տեղի էր ունեցել Կեմերեվոյի «Զիմնյայա վիշնյա» առեւտրի կենտրոնում հրդեհից մեկ շաբաթ հետո, որի հետեւանքով 64 մարդ էր զոհվել: Տուլեեւը պարզաբանել էր, որ «բարոյապես չի կարելի նման ծանրագույն բեռով աշխատել նահանգապետի պաշտոնում»:

Տուլեեւի հրաժարականից 2 օր անց նա ստացել էր  Կեմերովոյի մարզի ժողովրդական պատգամավորների խորհրդի պատգամավորի մանդատ: Ապրիլի 5-ին 8 պատգամավորներ նահանգապետի ժամանակավոր պաշտոնակատար Սերգեյ Ցիվիլեւին խնդրել էին աջակցել մարզային խորհրդարանի խոսնակի պաշտոնում Տուլեեւի թեկնածության առաջադրմանը: