նախընտրելի դարձնել
Կանադան փորձում է դաշնակիցների, այդ թվում Գերմանիայի եւ Շվեդիայի աջակցությունը ստանալ, որպեսզի Սաուդյան Արաբիայի հետ առաջացած սկանդալը կարգավորի, հաղորդում է AFP-ն` վկայակոչելով Կանադայի կառավարության աղբյուրին:
Բարձրաստիճան պաշտոնյայի խոսքով, Արտաքին գործերի նախարար Խրիստյա Ֆրիլենդը եվրոպական երկու երկրների իր գործընկերների հետ հանդիպումներ է ունեցել:
Գերմանիան եւ Շվեդիան նախկինում նույնպես բախվել են Սաուդյան Արաբիայի զայրույթին մարդու իրավունքների իրավիճակի քննադատության պատճառով:
Ֆրիլենդը փորձել է պարզել, թե ինչպես են նրանք լուծել այդ տարաձայնությունները եւ խնդրել է նրանց աջակցությունը: Օտտավան նաեւ նախատեսում է ներգրավել ԱՄԷ-ին եւ Մեծ Բրիտանիային, որը Սաուդյան Արաբիայի հետ ամուր պատմական կապեր ունի:
Կանադան հիասթափվել է նրանից, որ արեւմտյան տերությունները, այդ թվում` Միացյալ Նահանգները, հրապարակավ Օտտավային չեն աջակցել:
«Երկու կողմերը պետք է դիվանագիտական ճանապարհով լուծեն այդ հարցը, մենք չենք կարող դա անել նրանց փոխարեն»,- ճեպազրույցում ասել է Պետդեպարտամենտի պաշտոնական ներկայացուցիչ Հիզեր Նաուերթը:
Հիշեցնենք, որ Սաուդյան Արաբիայում ձերբակալված ակտիվիստներին ազատելու Կանադայի կոչից հետո Ռիադը հետ կանչեց իր դեսպանին եւ Կանադայի դեսպանին երկրից արտաքսեց: Բացի այդ, Կանադայի հետ առեւտրային բոլոր նախագծերը կասեցվել են:
