նախընտրելի դարձնելՀՀ կրթության եւ գիտության նախարար Արայիկ Հարությունյանը եւ նախարարի տեղակալ Հովհաննես Հովհաննիսյանն աշխատանքային այց են կատարել Հայաստանի ազգային ագրարային համալսարան:
ԿԳՆ-ից NEWS.am-ին հայտնում են, որ ՀԱԱՀ ռեկտորի պաշտոնակատար Վարդան Ուռուտյանի ուղեկցությամբ նախարարը շրջել է բուհում, ծանոթացել ուսումնական գործընթացի կազմակերպման պայմաններին: Նախարարին ներկայացվել է գինու քիմիական եւ ուսումնական լաբորատորիան եւ համտեսի սրահը, որոնք կահավորվել եւ տեխնիկապես վերազինվել են Գերմանիայի միջազգային համագործակցության ընկերության (CIZ) կողմից իրականացվող «Մասնավոր հատվածի զարգացում Հարավային Կովկասում» ծրագրի շրջանակում` գերմանական կողմի ֆինանսավորմամբ:
Նախարարը շրջել է նաեւ համալսարանի Ագրոբիզնեսի հետազոտությունների եւ ուսուցման միջազգային կենտրոնում եւ նույն մասնաշենքում տեղակայվոծ Գինու ակադեմիայում: Ռեկտորի պաշտոնակատար Վ. Ուռուտյանը նախարարին ներկայացրել է Ագրոբիզնեսի հետազոտությունների եւ ուսուցման միջազգային կենտրոնում իրականացվող կրթական ծրագիրը, որի շրջանակում Հայաստանի ազգային ագրարային համալսարանը համագործակցում է Տեխասի Էյ ընդ Էմ համալսարանի հետ: Ագրոբիզնեսի հետազոտությունների եւ ուսուցման կենտրոնում գործում են մագիստրոսական (MAB) եւ բակալավրիական կրթական ծրագրեր, որոնք տարածաշրջանում եզակի անգլալեզու բարձրագույն կրթական ծրագրերն են ագրոբիզնեսի տնտեսագիտության բնագավառում:
Ռեկտորի պաշտոնակատարի տեղեկացմամբ` թե բակալավրիատի եւ թե մագիստրոսական ծրագրի ուսումնական պլանները արեւմտյան կառուցվածք ունեն եւ հիմնված են Տեխասի Էյ ընդ Էմ համալսարանի համապատասխան ուսումնական պլանների վրա: Ուսուցման կենտրոնում շրջելու ընթացքում ԿԳ նախարարը զրուցել է ուսանողների հետ, հետաքրվել, թե շրջանավարտները որքանով են մրցունակ աշխատաշուկայում: Կենտրոնի պատասխանատուների հավաստամամբ` Ագրոբիզնեսի եւ շուկայաբանության միջազգային ծրագրի շրջանավարտների 95 տոկոսն աշխատում է մասնագիտությամբ` ստանալով համեմատաբար բարձր վարձատրություն:
Ռեկտորի պաշտոնակատարը նախարարին հակիրճ ներկայացրել է նաեւ Հայաստանի ազգային ագրարային համալսարանի զարգացման ծրագիրը եւ մոտ ապագայում նախատեսվող նախաձեռնությունները:
