Հայաստանում Ֆրանսիայի դեսպան Անրի Ռենոն պատրաստակամություն է հայտնել աջակցել Հայաստանում տրանսպորտի եւ ենթակառուցվածքների ոլորտում իրականացվելիք ներդրումային ծրագրերին:

Այս մասին նա հայտարարել է այսօր` ապրիլի 20-ին Հայաստանի տրանսպորտի եւ կապի նախարար Մանուկ Վարդանյանի հետ հանդիպման ժամանակ:

Ինչպես NEWS.am-ը տեղեկանում է Տրանսպորտի եւ կապի նախարարի մամուլի քարտուղար Սուսաննա Տոնոյանից, հանդիպմանը մասնակցել է նաեւ դեսպանության տարածաշրջանային տնտեսական ծառայության Կովկասի եւ Թուրքմենստանի հարցերով ղեկավար Դանիել Պատան եւ դեսպանատան տնտեսական հարցերով կցորդ Ժուլիեն Վալկովը:

Դեսպանի խնդրանքով նախարարը մանրամասն ներկայացրել է տրանսպորտի եւ ենթակառուցվածքների ոլորտում իրականացվելիք ներդրումային ծրագրերը, այդ թվում` «Հյուսիս հարավ» ավտոմայրուղու, «Հյուսիս-հարավ» եւ  Վանաձոր-Ֆիալետովո երկաթգծերի կառուցման ծրագրերի ընթացքը: Նախարարը դեսպանին առաջարկել է, որպեսզի վերոնշյալ ծրագրերի իրականացմանը մասնակցեն նաեւ ֆրանսիական ընկերությունները:  

Մ.Վարդանյանն անդրադարձել է դեպի «Զվարթնոց» օդանավակայան նոր ճանապարհի, երկաթգծի եւ մետրոպոլիտենի կառուցման խնդիրներին, ինչպես նաեւ ընդհանուր տրանսպորտային հարցերին, այդ թվում` ավոտկայարանային տնտեսությունը կոնցեսիոն կառավարման հանձնելու նախագծին:

Նախարար Մ.Վարդանյանը կարեւորել է ֆրանսիական փորձի փոխանակումը հատկապես հեռուստատեսության թվայնացման ոլորտում:

Հանդիպման ընթացքում քննարկվել են նաեւ Հեռահաղորդակցության միջազգային  միության կողմից Հայաստանին հատակացված ուղեծրային կետերի համատեղ շահագործման հնարավորությունները: