Հարց է առաջանում, թե ինչու իշխանությունները հանկարծ որոշեցին իրականացնել Իջեւանում համայնքների միավորումը: Դա ողջունելի է, սակայն անհասկանալի է, թե ինչու հենց այժմ որոշվեց միավորել համայնքները՝ ի շահ վարչապետ Նիկոլ Փաշինյանի սանիկի: Այս մասին այսօր Ազգային ժողովի նիստում «Հայաստանի Հանրապետության վարչատարածքային բաժանման մասին» օրենքում փոփոխություններ եւ լրացումներ կատարելու մասին օրինագծի լսումների ընթացքում հայտարարեց «Հանրային վերահսկողության կենտրոն» ՀԿ նախագահ Բաբկեն Հարությունյանը:

Նա նշեց, որ դեմ չէ համայնքների ընդլայնմանն ու միավորմանը: «Այժմ մենք կլուծենք սանիկի հետ կապված հարցը, սակայն ստացվում է, որ Արարատի մարզում որոշ համայնքների հարցը պետք է դեռ քննարկել եւ հասկանել՝ ինչ անել դրանց հետ: Եվ նույն հարցը վերաբերում է նաեւ Արմավիրի մարզի եւ այլ մարզերի համայնքներին: Միգուցե, պետք է ոչ թե 19, այլ 21 համայնք միավորե՞նք Իջեւանում»,- ասաց նա՝ հավելելով, որ 30 տարի է՝ Հայաստանում չեն փորձում ավելի երկարաժամկետ ռազմավարական ժամանակահատվածով ծրագրեր կազմել:

ՀԿ նախագահը հեգնանքով նկատեց, որ Հանրային հեռուստատեսության նորությունները դիտելիս տպավորություն է ստեղծվում, որ համայնքների միավորումն ու ընդլայնումը երկրում դրախտային պայմաններ կստեղծի: Այդ կապակցությամբ նա իշխանություններին կոչ արեց մարդկանց չմոլորեցնել:   

Նշենք, որ նախաձեռնության քննադատները դա կապում են Իջեւանի քաղաքապետի ընտրություններում իշխանության վարկանիշը փրկելու ցանկության հետ: Այդ պատճառով քաղաքի հետ մեկ համայնքի մեջ են միավորում մերձակա գյուղերը: