Կարսի հայ-թուրքական բարեկամության քանդվող հուշարձանի քանդակագործին հոգեբանական աջակցություն ցուցաբերելու նպատակով Էսքիշեհիր նահանգի   Թեփեբաշըի քաղաքապետարանը ցուցահանդես է կազմակերպել, որը մեծ արձագանք է գտել Թուրքիայում։

Թուրքական Beyazgazete-ի փոխանցմամբ՝  Թեփեբաշըի քաղաքապետարանում կազմակերպված ցուցահանդեսում ներկայացված նկարներից մեկում պատկերված է եղել մզկիթ, որի երկու կողմերում կանգնեցված են եղել Կարսի «Մարդկության» հուշարձանի երկու քանդակները, որոնց Թուրքիայի վարչապետը անվանել էր «հրեշավոր»։ Նկարում երկու քանդակների միջեւ գրված է եղել «հրեշավոր», իսկ մեկ այլ  նկարում մի գլխաշորով կին է պատկերված, որի դեմքին կանացի ներքնազգեստ է։  

Այս նկարը մեծ իրարանցում է առաջացրել թուրք հասարակության մի մասի մոտ, ովքեր համարում են, որ սրանով վիրավորանք է հասցվել մահմեդականությանը։

Ցուցահանդեսը նախատեսված է եղել ապրիլի 9-ից 22-ը, սակայն այցելուների մեծ հոսքի պատճառով այն հետաձգվել է։

Էսքիշեհիրի կրոնական գործերի վարչության նախագահը նշել է, թե այդ ցուցահանդեսում տեղ գտած մի քանի ստեղծագործություններում բացահայտ վիրավորանք կա կրոնի նկատմամբ։