նախընտրելի դարձնել
2020 թվականի բյուջեի նախագծով սկզբնապես ծրագրվում էր ապահովել 1 տրիլիոն 607 մլրդ դրամի չափով եկամտյանի մասը, սակայն կորոնավիրուսի պանդեմիայի հետ կապված տվյալ ցուցանիշը վերանայվեց՝ հօգուտ իջեցման: Այս մասին լրագրողների հետ հանդիպման ժամանակ հայտարարեց ՊԵԿ հարկային վարչարարության կազմակերպման, վերահսկման եւ մոնիթորինգի վարչության պետ Կարեն Թամազյանը:
Նրա խոսքով՝ վերջնական ցուցանիշը սահմանվել է 1 տրիլիոն 326 մլրդ դրամի չափով: Այնուամենայնիվ, ՊԵԿ-ին հաջողվել է վերակատարել ծրագիրն ու պետբյուջեն համալրել 1 տրիլիոն 385 մլրդ դրամով: «Այսինքն, մեզ հաջողվել է վերակատարել ցուցանիշները, որոնք նշված էին 2020 թվականի բյուջեի նախագծով ընդհանուր 59 մլրդ դրամի չափով»,-նշեց Թամազյանը:
Ընդ որում, պաշտոնյան հայտնեց, որ հայ հարկ վճարողներին վերադարձվել է գրեթե 138 մլրդ դրամ, որը եւս հավաքել է գերատեսչությունը: Այդպիսով, հարկային գերատեսչությանը հաջողվել է հավաքել 1 տրիլիոն 523 մլրդ դրամ:
Միեւնույն ժամանակ, նրա խոսքով, նշված 1 տրիլիոն 385 միլիարդից 71,3 տոկոսը բաժին է ընկնում առաջին հազար՝ երկրի ամենախոշոր հարկ վճարողներին: Փաստացի, նրանց է բաժին ընկնում հարկային վճարումների առյուծի բաժինը:
