նախընտրելի դարձնելԵԽԽՎ ամառային նստաշրջանի ժամանակ ելույթ է ունենալու ՀՀ նախագահ Սերժ Սարգսյանը, որին հարցեր տալու համար հերթագրվել է նաեւ «Ժառանգություն» խորհրդարանական խմբակցության պատգամավոր Զարուհի Փոստանջյանը: Թե ինչ հարցեր է տալու՝ պատգամավորն առայժմ չասաց, սակայն նշեց, որ Սերժ Սարգսյանի ելույթը լինելու է հունիսի 22-ին:
Ըստ Փոստանջյանի՝ ամառային նստաշրջանի ընթացքում անդրադարձ է լինելու մի շարք զեկույցների, այդ թվում նաեւ Թունիսի վերաբերյալ:
Պատգամավորի հավաստմամբ՝ ամառային նստաշրջանի ընթացքում ԵԽ մոնիտորինգի հանձնաժողովը կքննարկի Հայաստանի հարցը՝ պարզելու, թե արդյոք առաջընթաց գրանցվե՞լ է պարտավորությունների կատարման ուղղությամբ:
«Արդեն աշնանային նստաշրջանի ժամանակ ՀՀ հարցով համազեկուցողները հավանաբար իրենց զեկույցը պատրաստած կլինեն, եւ դրա քննարկումից հետո կընդունվի հերթական բանաձեւի նախագիծը ՀՀ-ի վերաբերյալ»,-նկատեց պատգամավորը:
Նշենք, որ ԵԽԽՎ ամառային նստաշրջանը տեղի կունենա հունիսի 20-24-ը:
