նախընտրելի դարձնելԵրեւանի եւ Ռիգայի միջեւ փոխգործակցությանն առնչվող հարցեր են քննարկվել Երեւանի քաղաքապետ Կարեն Կարապետյանի` Լատվիայի մայրաքաղաքի պատվիրակության հետ հանդիպման ժամանակ:
Երեւանի քաղաքապետարանի մամուլի ծառայությունից NEWS.am-ին հայտնում են, որ հանդիպման ժամանակ լատվիական կողմը ներկայացրել է Ռիգայի քաղաքային կառավարման մոդելը: Հյուրերը մատնանշել են լատվիական կողմի համար գործակցային հետաքրքրություն ներկայացնող հիմնական ոլորտները:
Լատիշ գործարարներն, ըստ պատվիրակության անդամների, հետաքրքրված են հատկապես շինարարության, բնակֆոնդի վերականգնման, փողոցների եւ շենքերի դեկորատիվ լուսավորման, զբոսաշրջային եւ մի շարք այլ ոլորտներում հնարավոր ներդրումային ծրագրերով:
Կարեն Կարապետյանն ընդգծել է քաղաքի բյուջեի ձեւավորման, տրանսպորտի կառավարման, սոցիալական բնակարանաշինության, առողջապահության, կրթության, զբոսաշրջության եւ այլ ոլորտներում միջազգային առաջավոր փորձի փոխանակման անհրաժեշտությունը. «Մենք բաց ենք ու պատրաստ քննարկելու կառուցողական ցանկացած առաջարկություն, ցանկացած ծրագիր»,– նշել է Երեւանի քաղաքապետը, առաջարկելով փորձի փոխանակման նպատակով համապատասխան մասնագետների փոխայցելություններ կազմակերպել:
Լատվիական կողմը Երեւանի քաղաքապետին է փոխանցել Ռիգա այցելելու Լատվիայի մայրաքաղաքի քաղաքապետի պաշտոնական հրավերը:
Լատվիական պատվիրակությունը այցելել է նաեւ մայրաքաղաքի Կենտրոն վարչական շրջանի աշխատակազմ, ուր համաձայնագիր է ստորագրվել կրթական, մշակութային, զբոսաշրջային ոլորտներում, ինչպես նաեւ փողոցների եւ մշակութային արժեք ներկայացնող շենքերի դեկորատիվ լուսավորության եւ մի շարք այլ բնագավառներում փոխգործակցության վերաբերյալ:
