նախընտրելի դարձնել
Վարկային հաստատությունները գտնվում են Կենտրոնական բանկի վերահսկողության ներքո: Այս մասին մարտի 3-ին Ազգային ժողովի նիստին Կենտրոնական բանկի խորհրդի անդամի ընտրության հարցի քննարկման ժամանակ, պատասխանելով «Հայաստան» խմբակցության պատգամավոր Արմենուհի Կյուրեղյանի հարցին, հայտարարեց թափուր պաշտոնի թեկնածու, Երեւանի պետական տնտեսագիտական համալսարանի դասախոս Լեւոն Սահակյանը։
Թեկնածուի խոսքով՝ ավանդական բանկինգը շուտով պետք է իր տեղը զիջի առցանց բանկինգին։ «Այս տեսանկյունից, կարծում եմ, սխալ կլինի Հայաստանին հետ պահել ֆինանսական տեխնոլոգիաների խթանումից կամ դրանց ներդրումից։ Դա սխալ մոտեցում է։ Սակայն այս հարցը կարող է բոլորովին այլ հարթության մեջ հայտնվել, հատկապես՝ հաշվի առնելով այն, որ այդ տեխնոլոգիաները կարող են խարդախության հետ կապված որոշակի ռիսկեր պարունակել։ Կենտրոնական բանկն իրականացնում է սպառողների շահերի պաշտպանության իր բոլոր վերահսկողական գործառույթները»,- պարզաբանեց Սահակյանը։
Այնուամենայնիվ, ինչպես նշեց թեկնածուն, բոլորը պետք է քաջ գիտակցեն, որ նման ծառայություններից իսպառ հրաժարվել հնարավոր չէ, եւ դա սխալ կլինի։
Նրա կարծիքով՝ շատ կարեւոր է աշխատել բնակչության ֆինանսական գրագիտության բարձրացման ուղղությամբ։ Սա հենց այն գործիքն է, որն առավել արդյունավետ կերպով կպաշտպանի սպառողներին:
