Դուբայը 5 միլիարդ դոլար արժողությամբ հսկա լուսնի տեսքով մեգա հանգստավայր է կառուցում։ Բավարար գումարով Դուբայում կարելի է գրեթե ամեն ինչ անել, եւ այժմ կարող եք ցուցակին ավելացնել եւս մեկը՝ քայլել լուսնի վրա կամ գոնե այնտեղ պատվիրել շքեղ սենյակ: Այս շաբաթ կանադական Moon World Resorts ճարտարապետական ​​ընկերությունը հայտարարել է 5 միլիարդ դոլար արժողությամբ հանգստավայր կառուցելու ծրագրերի մասին, հաղորդում է Robb Report-ը:

Ծրագրի նպատակն է օգնել այցելուներին զգալ տիեզերական զբոսաշրջությունը: Հանգստավայրի լուսնային մակերեւույթի շրջակայքը, որը կոչվում է «լուսնային գաղութ», նախատեսված է լուսնի մակերեւույթին (կամ գոնե նրան շատ մոտ) լինելու զգացողություն առաջացնելու համար:   

«Moon Dubai-ը զգալի ազդեցություն կունենա ԱՄԷ-ի տնտեսության բոլոր ասպեկտների վրա՝ ներառյալ զբոսաշրջությունը, տրանսպորտը, առեւտրային եւ բնակելի անշարժ գույքը, ենթակառուցվածքները, ֆինանսական ծառայությունները, ավիացիան եւ տիեզերքը, էներգետիկան, գյուղատնտեսությունը, տեխնոլոգիաները եւ, իհարկե, կրթությունը»,-ասում են համահիմնադիրներ Սանդրա Մեթյուզը եւ Մայքլ Հենդերսոնը, գրում  է Arabian Business-ը։   

Հյուրերը կարող են օգտվել գիշերային ակումբից, միջոցառումների կենտրոնից, լաունջից, սպա ծառայությունից եւ նույնիսկ լուսնային ուղեւորությունից։

Ընդհանուր շինարարությունը նախատեսվում է երկու տարվա ընթացքում, իսկ ավարտից հետո այն կունենա ավելի քան 224 մ բարձրություն։ Ակնկալվում է, որ այն կընդունի առնվազն 2,5 միլիոն այցելու։