Նախընտրելի
Ուկրաինայի նախագահ Վլադիմիր Զելենսկին պատժամիջոցներ է սահմանել Ռուսաստանի Դաշնության, Ուկրաինայի եւ Բելառուսի 198 քաղաքացիների նկատմամբ։ Սահմանափակիչ միջոցները ներդրվում են 10 տարի ժամկետով։
Այս մասին ասվում է պետության ղեկավարի հունվարի 15-ի № 23/2023 հրամանագրում։ Դրանով ուժի մեջ է դրվում Ուկրաինայի Ազգային անվտանգության եւ պաշտպանության խորհրդի «Անձնական հատուկ տնտեսական եւ այլ սահմանափակող միջոցների (պատժամիջոցների) կիրառման եւ փոփոխությունների մասին» որոշումը։
Ազգային անվտանգության եւ պաշտպանության խորհուրդը հաստատել է այս պատժամիջոցները հունվարի 15-ին՝ Ուկրաինայի անվտանգության ծառայության առաջարկներից հետո։ Պատժամիջոցների ցանկում ներառված են Ռուսաստանի Դաշնության, Ուկրաինայի եւ Բելառուսի 198 քաղաքացիներ։
«Նրանց թվում սահմանափակող միջոցներ են կիրառվել ռուսամետ լրագրող Դիանա Պանչենկոյի նկատմամբ, որն աշխատել է ՌԴ նախագահ Վլադիմիր Պուտինի կնքահոր՝ պետական դավաճանության մեջ կասկածվող Վիկտոր Մեդվեդչուկի հեռուստաալիքներում։
Բացի Պանչենկոյից, պատժամիջոցների տակ են հայտնվել Ուկրաինայի եւս յոթ քաղաքացիներ»,- նշում է ՈՒՆԻԱՆ-ը։
Պատժամիջոցներ են սահմանվել նաեւ խորհրդային եւ ռուս ռեժիսոր Անդրեյ Կոնչալովսկու, ռուս երգիչ Յուրի Լոզայի նկատմամբ։ Պատժամիջոցների ցանկում են ռուս լրագրող եւ երաժշտական քննադատ Սերգեյ Սոսեդովը, Դոնբասում վիրավորված զինվորական կոմիսար Սեմյոն Պեգովը եւ հոլիվուդյան ֆիլմերի թարգմանիչ Դմիտրի Պուչկովը, որը հայտնի է որպես «Գոբլին»։
