նախընտրելի դարձնել
Միացյալ Նահանգները պետք է ենթարկվի միջազգային նորմերին և ասիական երկրների հետ հարաբերություններում հրաժարվի «սառը պատերազմի» մտածելակերպից։ Այս մասին ճեպազրույցում հայտարարել է Չինաստանի ԱԳՆ պաշտոնական ներկայացուցիչ Մաո Նինգը՝ մեկնաբանելով ԱՄՆ նախագահ Ջո Բայդենի՝ Հանոյ կատարելիք այցի վերաբերյալ լրագրողի հարցը։
«Ասիական տարածաշրջանի երկրների հետ հարաբերություններում Միացյալ Նահանգները պետք է հրաժարվի զրոյական գումարով սառը պատերազմի մտածելակերպից, հետևի միջազգային հարաբերությունների նորմերին, չհարձակվի երրորդ կողմերի վրա և չվնասի տարածաշրջանային խաղաղությանը և կայունությանը», - ասել է Չինաստանի ԱԳՆ խոսնակը:
Ավելի վաղ հաղորդվել էր, որ Բայդենը սեպտեմբերի 10-ին կայցելի Հանոյ և բանակցություններ կվարի Վիետնամի Կոմունիստական կուսակցության կենտրոնական կոմիտեի գլխավոր քարտուղար Նգուեն Ֆու Տրոնգի հետ։ Politico թերթի փոխանցմամբ՝ ամերիկացի առաջնորդը մտադիր է Վիետնամում երկկողմ «ռազմավարական գործընկերության» մասին համաձայնագիր ստորագրել։ Համաձայնագիրը թույլ կտա «նոր երկկողմ համագործակցություն՝ աջակցելու Վիետնամի ջանքերին՝ զարգացնելու բարձր տեխնոլոգիաների ոլորտը, ներառյալ կիսահաղորդիչների արտադրությունը և արհեստական ինտելեկտը»: Հրատարակությունը կարծում է, որ այս քայլը նպատակ ունի «Մոտեցնել Հանոյին Վաշինգտոնի հետ` Պեկինի հետ լարվածության աճի պահին»:
