ԱՄՆ պաշտպանության նախարար Լլոյդ Օսթինը այսօր զանգահարել է Իսրայելի պաշտպանության նախարար Յոավ Գալանտին, որպեսզի քննարկի Գազայում ՀԱՄԱՍ-ի պատանդների ազատ արձակման կարգավիճակը, ներառյալ երեկ մի խումբ պատանդների ազատ արձակման ուրախ լուրը, հայտնել է Պենտագոնի խոսնակ, բրիգադի գեներալ Փեթ Ռայդերը:

«Նա ճանաչել է Իսրայելի, Քաթարի և Եգիպտոսի կառավարությունների կարևոր դերը համաձայնության հասնելու գործում, ինչը նաև կհանգեցնի Գազայի խաղաղ բնակիչներին մարդասիրական օգնության և վառելիքի մատակարարումների ավելացմանը: Պետքարտուղար Օսթինը կարծիք է հայտնել, որ մարդասիրական օգնությունը պետք է ավելանա, և որ խաղաղ բնակիչները պետք է ապահով տարածքներ ունենան Գազայի հատվածում օգնություն ստանալու համար»,- նշվում է հաղորդման մեջ։

Ըստ Ռայդերի հաղորդման,  ԱՄՆ նախարարն ընդգծել է «իր անսասան աջակցությունն ահաբեկչությունից պաշտպանվելու Իսրայելի իրավունքին» և  թարմ տեղեկություններ ստացել պատանդների ազատ  արձակման ընթացքում Գազայում Իսրայելի պաշտպանության բանակի օպերատիվ դադարի մասին:

Նշվում է, որ Օսթինը հաստատել է նաև ԱՄՆ-ի շահագրգռվածությունը Գազայում հակամարտությունը դեպի Լիբանան չտարածելու հարցում։

«Նա դատապարտել է Լիբանանի կողմից Իսրայելի դեմ շարունակվող սահմանային հարձակումները և իր աջակցությունն է հայտնել իսրայելցի խաղաղ բնակիչների՝ հյուսիսում գտնվող իրենց տներն անվտանգ վերադարձին։ 

Վերջում, պետքարտուղար Օսթինը թարմ տեղեկատվություն է ներկայացրել Մերձավոր Արևելքում իր ուժերն ու շահերը պաշտպանելու ԱՄՆ-ի ջանքերի մասին», - ասվում է Պենտագոնի մամուլի քարտուղարի հաղորդման մեջ: