ԱՄՆ նախագահի հանրապետական ​​թեկնածու Նիկի Հեյլին կասկած է հայտնել, որ իր կուսակից, նախկին նախագահ Դոնալդ Թրամփը, հոգեպես ունակ է նախագահ դառնալ այն բանից հետո, երբ հանրահավաքի ժամանակ իրեն շփոթել է Ներկայացուցիչների պալատի խոսնակ Նենսի Փելոսիի հետ, հայտնում է NBC News-ը։

Նյու Հեմփշիրում իր համախոհների առջև ելույթի ժամանակ Հեյլին քննադատել է Թրամփի խոսքերը՝ ասելով, որ նախագահական ընտրությունները «չպետք է վերածվեն երկու տղամարդկանց միջև բախման, որոնք մոտ 80 և ավելի տարեկան են»։

«Մենք տեսնում ենք, թե (նախագահ Ջո) Բայդենը երկու տարվա ընթացքում որքան է փոխվել,- ասել է Հեյլին:-  Բայց Թրամփը երեկ երեկոյան հանրահավաքին էր, և նա   մի քանի անգամ հիշատակեց ինձ՝ խոսելով այն մասին, թե ինչու ես անվտանգություն չեմ ապահովել Կապիտոլիումի անկարգությունների ժամանակ: Ինչո՞ւ ես ավելի լավ չհաղթահարեցի հունվարի 6-ի իրավիճակը: Ես նույնիսկ հունվարի 6-ին Վաշինգտոնում չէի: Ես այդ ժամանակ գրասենյակում չէի»,- նշել է նա։

Միաժամանակ Հեյլին կասկածի տակ է դրել իր կուսակցի հոգեվիճակը։

«Նրանք ասում են, որ նա շփոթվել է, որ  խոսել է այլ բանի մասին, նա խոսել է Նենսի Փելոսիի մասին, - շարունակել է Հեյլին:- Այս սցենարում նա մի քանի անգամ հիշատակել է ինձ։ Իմ մտահոգությունն այն է, ես նվաստացուցիչ ոչինչ չեմ ասում, բայց երբ դուք բախվում եք նախագահականի ճնշումներին, մենք չենք կարող թույլ տալ, որ որևէ մեկը կասկածի, թե արդյոք նա հոգեպես պիտանի է դրա համար: Մենք չենք կարող»։

Թրամփի մեկնաբանություններն արվել են ուրբաթ օրը Նյու Հեմփշիր նահանգի Կոնկորդ քաղաքում տեղի ունեցած հանրահավաքի ժամանակ, որտեղ նա բազմիցս քննադատել է Հեյլին՝ նրան անվանելով «գլոբալիստ ապուշ» և ենթադրելով, որ  չէր ընտրի նրան իրեն օգնական, եթե հանրապետականների կողմից հաղթեր  նախագահական ընտրություններում։

Խոսելով 2021 թվականի հունվարի 6-ին Կապիտոլիումի գրոհի մասին, ավելի քան 90 րոպեանոց ելույթի ժամանակ Թրամփն ասել է.«Նիկի Հեյլի, դուք գիտեք, որ նրանք  ոչնչացրել են ամեն ինչ, ամբողջ տեղեկատվությունը, ապացույցները: Այս ամենը  բազմաթիվ բաների պատճառով, ինչպիսիք են Նիկի Հեյլին, որը պատասխանատու է անվտանգության համար: Մենք նրան առաջարկեցինք 10 հազար մարդ, զինվոր, ազգային գվարդիա, ամեն բան, ինչ կուզեին։ Նրանք հրաժարվեցին։ Նրանք չեն ցանկանում խոսել այդ մասին։ Սրանք շատ անազնիվ մարդիկ են»։