Իսրայելի ռազմական կաբինետի նախարար Բենի Գանցը վերջնագիր է ներկայացրել վարչապետ Բենիամին Նաթանյահուին՝ պահանջելով, որ նա հավատարիմ մնա Գազայի հակամարտությունը կարգավորելու համաձայնեցված տեսլականին, որը պետք է ներառի որոշում, թե ով է ղեկավարելու Գազան ՀԱՄԱՍ-ի պարտությունից հետո, և նախազգուշացրել է, որ ինքը կլքի կոալիցիան, եթե դա տեղի չունենա, հայտնում է Times of Israel-ը:

Հայտարարության մեջ, որն առաջացրել է կառավարության մյուս անդամների բուռն վրդովմունքը, Գանցը հայտարարել է, որ իր կարծիքով, Գազայում պատերազմը վերջին ամիսներին շեղվել է իր ուղղությունից իսրայելական որոշ առաջնորդների վախկոտության պատճառով:

Ըստ Գանցի, ռազմական կաբինետը պետք է ձևակերպի և հաստատի գործողությունների ծրագիր՝ «վեց ռազմավարական նպատակների» հասնելու համար։

Խոսքը, մասնավորապես, վերաբերում է պատանդներին հայրենիք վերադարձնելուն, «ՀԱՄԱՍ-ի իշխանությունը տապալելուն, Գազայի հատվածի ապառազմականացմանը» և «անվտանգության հատվածի» վրա Իսրայելի վերահսկողության հաստատմանը։

Ըստ Գանցի, դրա հետ մեկտեղ Իսրայելի անվտանգության վերահսկողությունը պետք է «ստեղծի Գազայի կառավարման միջազգային քաղաքացիական մեխանիզմ, որը կներառի ամերիկյան, եվրոպական, արաբական և պաղեստինյան տարրեր, ինչը նույնպես հիմք կծառայի ՀԱՄԱՍ-ից և Պաղեստինի նախագահ Մահմուդ Աբասից տարբերվող ապագա այլընտրանքի համար»:

Նա նաև կոչ է արել հյուսիսի բնակիչներին վերադառնալ տուն մինչև սեպտեմբերի 1-ը և վերականգնել արևմտյան Նեգևը, որը ՀԱՄԱՍ-ի հարձակման թիրախն էր անցյալ տարվա հոկտեմբերի 7-ին:

Նախարարը նաև պահանջել է նպաստել Սաուդյան Արաբիայի հետ հարաբերությունների կարգավորմանը՝ «որպես ազատ աշխարհի և Արևմուտքի հետ դաշինքի կառուցման համապարփակ գործընթացի մի մաս՝ ընդդեմ Իրանի և նրա դաշնակիցների» և ընդունել (ռազմական/ազգային) ծառայության համակարգը, ըստ որի բոլոր իսրայելցիները պետք է ծառայեն պետությանը և իրենց ներդրումն ունենան ազգային ջանքերում»: