Ավտոաշխարհ09:03 | 11 հունվարի, 2025

Honda-ն ցուցադրել է իր ապագա սերիական էլեկտրական մեքենաների նախատիպերը

ԱՄՆ-ում սպառողական էլեկտրոնիկայի CES-2024 ցուցահանդեսում ճապոնական Honda Motor-ը ցուցադրել է իր հեռանկարային էլեկտրական մեքենաների՝ սեդանի եւ քրոսովերի նախատիպերը։ Այս մասին տեղեկացրել է Drom.ru-ն։

Մեքենաները պատկանում են նոր Zero շարքին. այն այդպես է անվանվել՝ շահագործման ընթացքում վնասակար արտանետումների զրոյական մակարդակն ընդգծելու համար։ Սեդանը պայմանականորեն ստացել է Zero Saloon անվանումը, ամենագնաց մեքենային տրվել է Space Hub անվանումը:

Zero էլեկտրական մեքենաները կառուցված են մեկ միասնական մոդուլային հարթակի վրա, որի ֆունկցիոնալությունը վերահսկվում է Asimo OS օպերացիոն համակարգի եւ ինտեգրված Helm.ai արհեստական բանականության կողմից:

Նոր էլեկտրական մեքենաների ինքնավար վարման համալիրը համապատասխանում է 3+ մակարդակին, այսինքն՝ ավտոպիլոտը կարող է ամբողջությամբ վերցնել մեքենայի կառավարումը, ներառյալ արտակարգ իրավիճակներին արձագանքելը: Այս դեպքում վարորդից կպահանջվի միջամտություն միայն որոշակի սցենարների դեպքում։ Արհեստական բանականության համակարգը մեծացնում է ավտոմատ ռեժիմի ճշգրտությունն ու անվտանգությունը. այն «մարզվում» է տվյալների մեծ զանգվածի վրա՝ փորձառու վարորդների վարելու ոճի վերլուծությամբ: Helm.ai-ն մշակվել է ճապոնական Renesas ՏՏ ընկերության հետ համատեղ:

Արհեստական բանականության հետ են կապված մեքենայի կառավարման մի քանի էլեկտրոնային բլոկներ, որոնք պատասխանատու են ավտոպիլոտի, տրանսմիսիայի եւ հարմարավետության համար։

Zero Saloon-ում եւ Space Hub-ում կօգտագործվի լիցքի NACS ամերիկյան ստանդարտը։

Խոստումնալից էլեկտրական մեքենաների համար Honda-ն մշակել է ծրագիր, որն օպտիմալացնում է վերալիցքավորումը. յուրաքանչյուր օգտագործողի համար ավտոմատ կերպով կպատրաստվի «լիցքավորման պլան»՝ հաշվի առնելով նրա անհատական հատկանիշները, ինչը թույլ կտա նվազեցնել էներգիայի ծախսերը: Բացի այդ, էլեկտրական մեքենաները կարող են նույնիսկ տնային տնտեսությունն ապահովել էներգիայով արտակարգ իրավիճակների դեպքում կամ ծախսերը խնայելու համար: